Қостанай облысында жеке кәсіп ашуға 280 мемлекеттік грант беріледі

Биыл Қостанай облысында жеке кәсібін ашуға және бизнесін дамытуға мүдделі адамдарға 280 мемлекеттік грант беріледі.

Қоғамның осал топтарына арналған қайтарымсыз қаржыға үміт артатындар аз емес. Бірақ бәрінің бірдей бизнес жобасы талапқа сай келе бермейді.

Ал өтеусіз ақшаны былтыр иеленгендер кәсібін дөңгелетіп әкете алды ма?

Он баланың анасы Құралай Байкенова әуесқой тігінші. Әжесінің қасында жүріп, құрақ көрпе тігіп, киіз бастыруды балғын жастан үйренген. Сол білген-түйгенін табыс көзіне айналдыру үшін шағын цех ашуға шешім қабылдап, былтыр мемлекеттік грантқа қол жеткізді. 

Құралай Байменова, кәсіпкер:

- Миллион 572 мың тенге. Соған машина алдым мынау жеңіл машина, сосын мынау үлкен машинаны алдым. Принтер, ноутбук, мынау стелаждар, рабочий стол сияқты, сондай заттар алдым. Енді тәуекел жасағасын адам өзі, жігер болу керек қой. Сонда ғана жетесің табысқа.

Цехтың ашылғанына небәрі төрт ай өтсе, қала ішінде танылып үлгерген. Құралайдың қолынан шыққан ұлттық үлгідегі көрпе, кәде-сыйлар жақсы сұранысқа ие. Тіпті алдағы айларға тапсырыс алып қойған. Үлгермей жатса, туған сіңлісі, балалары көмектеседі.  

Аружан Тұрсынбек, Қ. Байменованың қызы:

- Мынау корзинкаларға жылтырақтарды клеймен жабыстыру, Распечатка істеу, сәндеп, көркемдеу көбінесе дизайнмен айналысам. Көрпе тігуге де көмектесемін. 

Облыстық жұмыспен қамтуды үйлестіру және әлеуметтік бағдарламалар басқармасы өкілінің айтуынша, берілген демеуқаржының басым бөлігі технологиялық құрал-жабдықтар, қажетті керек-жарақтар алуға жұмсалған. Грант иегерлерінің 95 проценті бастаған ісін жалғастырып жатыр.

Аружан Бегалова, жұмыспен қамтуды үйлестіру және әлеуметтік бағдарламалар басқармасының бас маманы:

- Былтыр Қостанай облысына 198 грант берілді. Ал өтініш 300-ге жуыққа жетті. 198-і ғана конкурстан өтті. Ал толық гранттың сомасы 308 миллион теңге. 

Мағауия Қалиев, тілші:

- Қостанай облысына биыл әлеуметтік осал топқа жататын азаматтарға жеке кәсібін ашуға 280 мемлекеттік грант бөлініп отыр. Былтырға қарағанда бұл біршама көп. Оны алуға алдағы мамыр маусым айынан бастап, өтініштер қабылдай бастайды. 

Мағауия Қалиев, Ермек Мұхамедияров