Пробациялық бақылау кәсіп ашуға кедергі емес

Павлодарда пробация қызметінің есебінде тұрған азамат жеке кәсібін ашып, жаңа өмір бастады. Пробациялық жүйе жазасын өтеп шыққандарды тек бақылап қана қоймай, әлеуметтік-құқықтық көмек көрсету арқылы қоғамға бейімдейді. 

Өңірде осындай оң нәтижелер аз емес. Екі қолға бір күрек таба алмай жүрген жандар кәсіпкерлікке бет бұрып жатыр. Қылмыстық-атқару жүйесінің мамандары олардың құжаттарын рәсімдеуден бастап, бизнесті жолға қою кезеңіне дейін кеңес беріп, қолдау көрсетеді.

Павлодар облысы бойынша Қылмыстық-атқару жүйесі департаментінің пробация қызметінде 600-ге жуық адам есепте тұр. Солардың бірі – Иван Бойко. Бір жылға жуық  пробациялық бақылауда болған ол қиын кезеңдер артта қалғанын айтады. Өзі де қол қусырып отырмай жеке кәсіп ашқан. Төрт адамды тұрақты жұмыспен қамтып отыр.

Иван Бойко, жеке кәсіпкер:

- Келешекте бизнес ауқымын кеңейтіп, тағы бір павильон ашуды жоспарлап отырмын. Менің  мамандығым – механик-слесарь. Бұрын көлік жөндеу орталығым да болған. Оны да қалпына келтіремін. Өмірімдегі оң өзгерістерге жақындарыммен достарым қуанып жатыр.

Жол бойында орналасқан шағын дәмханаға келушілер аз емес. Ұлттық тағамдар дайындалатын павильон қала тұрғындары мен қонақтарының қызығушылығын тудырып отыр.

Руслан Әубәкіров, Павлодар қаласының тұрғыны:

- Мен бұл жерге түскі ас ішуге келіп тұрамын. Тамақтары дәмді және түрлері өте көп. Жұмысыма жақын орналасқан. Сондықтан өте қолайлы.

Жазасын өтеп шыққандардың қоғамға бейімделуіне Қылмыстық-атқару жүйесінің қызметкерлері қолдау көрсетеді. «Мұндай көмек олардың жауапкершілігін арттырып,  бойына сенімділік ұялатады», - дейді мамандар.

Анар Уәлиева, Облыстық ҚАЖ департаментінің бөлім бастығы:

- Қылмыстық-атқару жүйесі департаменті мен пробация қызметі тарапынан тұрақты түрде психологиялық көмек көрсетіледі және кеңес беріледі. Сонымен қатар шағын немесе орта бизнесті ашу барысында құжаттарды рәсімдеуге жан-жақты сүйемелдеу жүргізіледі. Бұдан бөлек, шағын кәсіп ашуға арналған қайтарымсыз несие алу мүмкіндігі де қарастырылған.

Пробациялық есепте тұрған азаматтар арасында өз ісін ашуға ниет білдіргендер саны артып келеді. Иван Бойконың тәжірибесі бостандыққа шыққан басқаларға үлгі болып отыр.

Авторлары: Қарлығаш Қасиетова, Дәулет Қошқарбаев