СҚО да кәсіп ашуға ₸416 млн бөлінді

Биыл елде әлеуметтік жағынан осал топтағы адамдардың бизнес бастауына 9 мыңға жуық грант бөлінді, деп хабарлайды 24KZ. Оның басым бөлігін ауылдағы ағайын иеленді. Бұл қаржы қайтарымсыз. Осы бағытта Солтүстік Қазақстан облысында қандай жобалар жүзеге асты?

Альбина Әбілкина бес құрсақ көтерген ана. Бірақ бала тәрбиесімен үйде отырып қалған жоқ. Мемлекеттік бағдарлама бойынша 1,5 млн теңге қайтарымсыз грант алып, бұрыннан армандаған сән салонын ашты. 

Альбина Әбілкина, жеке кәсіпкер:

- Менің 5 балам бар. Мемлекет бізді қолдап, бізді көтеріп жатыр. Ешкім ештеңе саған бермейді. Сондықтан өзің жұмыс істеп, тірлік жасап, қимылдау керек кішкене. Мен өзімнің жұмысымды жақсы көремін. Өте жақсы көремін.

Мемлекеттік бағдарламаның тиімділігін Новоишим ауылының тұрғыны Анатолий Шикирюк те көрді. Мүгедектегі бар бала тәрбиелеп отырған әке үй жанынан дөңгелек жөндеу орнын ашып, табыс көзін арттырды.

Анатолий Шикирюк, жеке кәсіпкер:

- Мен жұмысыма жауапкершілікпен қараймын. Енді көлік жөндеу станциясын ашуды жоспарлап отырмын. Бұл жағынан мемлекеттің қолдауы өте зор. Қайтарымсыз грант – шағын кәсіп ашуға нағыз мүмкіндік.

Биыл Солтүстік Қазақстан облысында әлеуметтік жағынан осал топтағы жандардың бизнес бастауына 416 млн теңге бөлініп, 71 жоба жүзеге асты.

Нұрлан Биболаев, Еңбек мобильдігі орталығының директоры:

- Көбіне қандастар, көші-қон бағдарламасымен келген азаматтар, көпбалалы аналар, мүгедек балаларды бағып отырған жанұялар ала алады. Негізінен мал шаруашылығын дамытуға, оның ішінде мал шаруашылығын, өсімдік өсіру және де өз өнімдерін шығаруға алды.

Мемлекеттік гранттың қайтарымы болмаса да, жауапты органдармен қатаң қадағаланады. Қаржылай қолдау көрген алған әр адам бизнес жобасы бойынша үш ай сайын есеп беріп отырады. Бұл бөлінген ақшаның тиімді жұмсалуын қамтамасыз етеді.

Авторлары: Айдарбек Айтмұхамбетұлы, Қуаныш Қазбеков