Көкшетауда кітапханашылар еңбегі еленді

Рухани құндылықтарды дәріптеуді мақсат еткен іс-шараға сала мамандары, зиялы қауым өкілдері мен оқырмандар жиналды.

Жиында Ақмола облысы әкімінің атынан құттықтау сөз сөйлеген облыс әкімінің орынбасары Досұлан Айтбаев кітапхана ісінің қоғамдағы маңызын ерекше атап өтті. Оның айтуынша, кітапхана – тек ақпарат көзі ғана емес, ұлттың рухани дамуына ықпал ететін маңызды мәдени орталық. Сондай-ақ ол Ұлттық кітап күніне арналған онкүндік аясында атқарылған жұмыстарға жоғары баға беріп, сала қызметкерлеріне алғыс білдірді.

Айта кетейік, онкүндік барысында облыстың қала және аудан орталықтарында түрлі мәдени іс-шаралар ұйымдастырылды. Атап айтқанда, кітап фестивальдері, оқу марафондары, жазушылармен кездесулер мен автограф-сессиялар, жаңа кітап клубтарының ашылуы тұрғындардың кітап оқуға деген қызығушылығын арттыруға бағытталды.

Биыл өңірде тағы бір маңызды бастама жүзеге аспақ. Облыстық әмбебап ғылыми кітапхананың 80 жылдық мерейтойы аясында Көкшетауда алғаш рет республикалық деңгейдегі кітапханашылар форумы өтеді. Аталған іс-шара Қазақстандық кітапханалық одақ қолдауымен ұйымдастырылмақ.

Форум кәсіби тәжірибе алмасуға, өңіраралық ынтымақтастықты нығайтуға және кітапхана мамандарының біліктілігін арттыруға бағытталады. Сонымен қатар, бұл алаң жаңа идеялар мен инновациялық тәжірибелерді енгізуге, қоғамда кітап оқуды кеңінен насихаттауға мүмкіндік береді деп күтіліп отыр. 

Ұйымдастырушылардың мәліметінше, ауқымды жиынға еліміздің барлық өңірлерінен мемлекеттік органдардың өкілдері, жетекші кітапханашылар, сондай-ақ мәдениет, білім беру және цифрлық технологиялар саласының сарапшылары қатысады.

Бұдан бөлек, алдағы бір ай ішінде облыс бойынша жаппай кітап клубтарын ашу жоспарланып отыр. Бұл бастама аясында 200 мыңнан астам оқырманды қамту көзделген. Сарапшылар мұндай жобалар кітап оқу мәдениетін жаңа деңгейге көтеруге ықпал етеді деп есептейді.