Коллекторлар 16 миллион қазақстандықтың жеке дерегін заңсыз пайдаланған

Жетісу облысында миллиондаған қазақстандықтың жеке мәліметтерін заңсыз пайдаланған коллекторлық агенттіктің қызметі әшкереленді.
Бұл туралы Жетісу облысы Полиция департаменті хабарлады.

Тергеу мәліметінше, күдіктілердің қолында азаматтардың жеке деректері жинақталған арнайы ақпараттық жүйе болған. Базада адамдарды тегі, аты-жөні, жеке сәйкестендіру нөмірі (ЖСН) және ұялы телефон нөмірі арқылы іздеуге мүмкіндік жасалған.

Құқық қорғау органдарының алдын ала деректеріне сәйкес, жүйеде Қазақстанның шамамен 16 миллион азаматына қатысты ақпарат сақталған болуы мүмкін.

Заңсыз әрекет Жетісу облысы Полиция департаменті қызметкерлерінің прокуратура және Ұлттық қауіпсіздік комитеті өкілдерімен бірлескен жұмысы барысында анықталған.

Жедел-іздестіру іс-шараларының нәтижесінде деректер базасын ұйымдастыруға және пайдалануға қатысы бар деген күдікпен үш адам ұсталды.

Полицияның мәліметінше, күдіктілердің тұрғылықты мекенжайлары мен жұмыс орындарында санкцияланған тінтулер жүргізіліп, көптеген компьютерлік техника мен мобильді құрылғылар тәркіленген. Тергеу аясында бірнеше адам қосымша тексеру үшін ішкі істер органдарына жеткізілген.

Аталған факті бойынша сотқа дейінгі тергеу басталды. Қазір құқық қорғау органдары жеке деректердің қайдан алынғанын, қандай мақсатта пайдаланылғанын және үшінші тұлғаларға таратылған-таратылмағанын анықтап жатыр.

Полиция азаматтардың жеке деректерін заңсыз жинау, сақтау, тарату және пайдалану қолданыстағы заңнамаға сәйкес қылмыстық жауапкершілікке әкелетінін ескертті.