Батыс Қазақстанда дәрігер билеп жүріп, науқастардың жеке дерегін жариялап жіберді

Батыс Қазақстан облысында аудандық аурухана дәрігері шығармашылық шабыт үстінде өз науқастарының жеке деректерін желіге жариялап жіберген, – деп хабарлайды Aikyn.kz сайты.

Дарьинск ауылының тұрғыны @halyqstanBOT чатына дәрігер Толғанай Сәтбайдың рилс түріндегі видеосын жіберген.

Ер адам қыздың науқастардың құпия ақпаратын ашық түрде жариялап, дәрігерлік этиканы бұзғанын айтты.

Шынында да, бейнероликтердің бірінде дәрігер компьютер экранында ашық тұрған құжаттарды көрсетеді. Онда пациенттердің анкеталық деректері мен диагноздары жазылған.

Видеодағы жазбадан бұл адамдардың Дарьинск тұрғындары екені және дәрігердің қабылдауында болғаны анық көрінеді.

Бұдан бөлек, ер адам дәрігердің “Дәрігерлер қалай билейді?” деген атаумен жариялаған рилсіндегі биіне де таңғалған.

Онда нарколог-дәрігер есірткіні еркін сатып ала алмай, қиналғандар жайлы әнге билеп тұрған.

Дарьинск тұрғыны мұндай видеоны нашақорлықты насихаттау деп санауға болады деп есептейді.

Бұл жағдайға қатысты түсініктеме алу үшін редакция облыстық денсаулық сақтау басқармасына жүгінді.

Басқарма басшысының орынбасары міндетін атқарушы Алмас Жүнісбеков түсініктеме берді:

– Әлеуметтік желілерде құжаттармен, пациенттермен, әсіресе жұмыс орнында түсірілген фото немесе видеоларды жариялауға қатаң түрде тыйым салынады! Мұндай әрекеттер біздің медицина ұйымдарының абыройына кері әсер етуі мүмкін. Қазір бұл жағдай бойынша тексеру мен профилактикалық әңгімелер жүргізіліп жатыр. Біз мәселені бақылауда ұстаймыз! – деді ол.