Көмір бар, жөндеу жұмыстары әлі де жүріп жатыр: Қазақстанда жылыту маусымына қалай дайындалып жатыр

Премьер-министр Олжас Бектенов жылыту маусымына дайындық бойынша қалған жұмыстарды аяқтауды және жылудың уақытылы берілуін қамтамасыз етуді тапсырды. Кеңесте отын қоры мен энергетикалық, әлеуметтік және тұрғын үй-коммуналдық инфрақұрылымның дайындығы талқыланды, деп хабарлайды Tengrinews.kz.

Энергетика министрлігінің мәліметінше, маусымның басталуына қарай Қазақстанда негізгі энергия көздері дайындалып, отынның нормативтік қоры жасақталған. Төрт энергия блогы, 28 қазандық және 18 турбинаны жөндеу жұмыстары аяқталды. Тағы үш энергия блогында, 26 қазандық пен 21 турбинада жұмыстар жалғасып жатыр.

Жылу желілері 93 пайызға дайын: жоспарланған 377 шақырымның 352-сі жөнделді. Реконструкциялау мен күрделі жөндеуге 196,8 миллиард теңге қарастырылған. Тағы 27,9 миллиард теңге шұғыл жұмыстарға Үкімет резервінен бөлінген.

Ресми деректер бойынша, қазіргі уақытта энергия көздерінің қоймаларында 4,8 миллион тонна көмір мен 127 мың тонна мазут бар. Бекітілген кестеге сәйкес тағы 255 мың тонна мазут жеткізілуі тиіс. Алдағы маусымда халық пен коммуналдық-тұрмыстық сектордың көмірге деген жалпы қажеттілігі 7,3 миллион тонна деп бағаланып отыр.

Кеңес барысында премьер-министрге жоспарға енгізілген барлық білім беру және денсаулық сақтау нысандарының, қазандықтардың, сондай-ақ тұрғын үйлердің жылыту маусымына дайындығы аяқталғаны туралы баяндалды. Әңгіме 10 913 оқу орны, 5 394 медициналық нысан, 14 939 автономды қазандық және 53 610 үй туралы болып отыр.

Жиында Абай, Ақмола, Солтүстік Қазақстан және Ұлытау облыстары әкімдерінің есептері бөлек тыңдалды.

Абай облысында 53,7 шақырым жылу желісін ауыстыру жұмыстары жалғасуда, қазандық жабдықтарын жөндеу 95 пайызға орындалды. Барлық жұмыстарды қыркүйек айының соңына дейін аяқтау жоспарлануда.

"Білім беру, денсаулық сақтау, әлеуметтік сектор нысандары мен тұрғын үй қорының жылыту маусымына толық дайындығы қамтамасыз етілді. Барлық жұмысты қыркүйек айының соңына дейін аяқтау жоспарланып отыр", – деп атап өтті Абай облысының әкімі Берік Уәли.

Ақмола облысында 26 қазандықтың 24-і ауыстырылып, 37 шақырым жылу желісі жөнделді - бұл жоспардың 97 пайызы. Сондай-ақ төрт блокты-модульді қазандықтың құрылысы аяқталып келеді, Степногорск ЖЭО мен қалалық жылу магистралін жөндеу жұмыстары жалғасып жатыр.

"Облыстың әлеуметтік нысандары мен тұрғын үй қоры толық дайындалды", – деп мәлімдеді отырыс барысында Ақмола облысының әкімі Марат Ахметжанов.

Солтүстік Қазақстан облысында Петропавл 2-ЖЭО жылу беруді бастауға дайын. Сегіз қазандық агрегаты әзірленіп, алты қазандық пен алты турбинаны жөндеу жұмыстары аяқталды. Петропавл жылу магистральдарындағы жұмыстарды 20 қыркүйекке дейін аяқтау жоспарланып отыр.

"Өңірде жылыту маусымы 28 қыркүйекте басталуы тиіс", – деп баяндады Солтүстік Қазақстан облысының әкімі Ғауез Нұрмұхамбетов.

Ұлытау облысында әкімдік мәліметінше, тұрғын үйлер мен әлеуметтік нысандар жылыту маусымына дайын. Жезқазған ЖЭО-да төрт қазандық пен төрт турбина жөнделді, №11 қазандыққа күрделі жөндеу жүргізілді.

"Сәтбаев қаласындағы ЖЭО мен №1 жылу станциясының басқа да жабдықтарын дайындау жұмыстары жалғасып жатыр", – деп атап өтті Ұлытау облысының әкімі Есет Байкен.

Кеңес қорытындысы бойынша премьер-министр қалған барлық жұмысты аяқтауды және жылудың уақытылы берілуін қамтамасыз етуді тапсырды. Энергетика министрлігіне "ҚТЖ-мен" бірлесіп, энергия нысандарына және халыққа көмір мен мазут жеткізу бойынша шаралар қабылдау тапсырылды.

"Азаматтарды жылумен үздіксіз қамтамасыз ету – Үкімет жұмысының басым бағыттарының бірі. Президенттің тапсырмасы бойынша жөндеу жұмыстарын қаржыландыру ұлғайтылды. Жергілікті әкімдер барлық нысанның, әсіресе әлеуметтік және өнеркәсіптік инфрақұрылымның дайындығын жеке бақылауда ұстауы тиіс", - деп атап көрсетті Олжас Бектенов.

Бектенов қысқа дайындықты уақытылы аяқтамағандар жауапкершілікке тартылатынын ескертті

Бізді Google-дың негізгі дереккөздер тізіміне қосыңыз