Конькиші Кристина Шумекова Әлем кубогында топ жарды: жалпы есепте алты алтын медаль жеңіп алды

Қазақстандық конькиші Кристина Шумекова юниорлар арасындағы Әлем кубогының алғашқы екі кезеңінде топ жарып, нағыз триумфқа қол жеткізді, – деп хабарлайды Aikyn.kz сайты.

Спортшы жалпы есепте алты алтын медаль жеңіп алды. Olympic.kz сайтына берген сұхбатында ол өзі үшін ең бастысы нәтижелердің өсуі екенін атап өтті.

«Маусымның басталуы мен үшін сәтті өтті деп есептеймін. Алты алтын медаль жеңіп алдым. Әрине, көрсеткен нәтижелер қуантты.

Сонымен қатар 1500 метр қашықтықта жеке рекордымды жаңарттым. Осының барлығы біздің бәрін дұрыс жасап жатқанымыздың, дұрыс бағытта қозғалып келе жатқанымыздың белгісі. Бұл мені қуантады.

Жалпы қандай уақыт көрсетуге болатынын шамалап білдім, бірақ алты рет қатарынан жеңіс тұғырының ең жоғарғы сатысына көтерілемін деп ойлаған жоқпын. Мен үшін ең маңыздысы — нәтижелердің өсуі.

Әрине, юниорлар деңгейіндегі әлемдік жарыстарда бірінші болу керемет. Бірақ біз жеткен жетістікпен тоқтап қалмаймыз. Алға қарай жүріп, өзімізді жетілдіріп, дамуды жалғастырамыз.

Алда Әлем кубогының финалы мен юниорлар арасындағы әлем чемпионаты күтіп тұр. Қазір командамен бірге 2026 жылы өтетін халықаралық жарыстарға дайындалып жатырмыз. Дайындық бапкерлеріміз Александр Жигин мен Дмитрий Обатуровтың жетекшілігімен сапалы әрі жоспарлы түрде өтуде», — деді Кристина Шумекова.