Көрші әйелдерді соққыға жыққан : Олимпиада чемпионы Данияр Елеусіновтың жұбайына айып тағылды

Қарағанды қаласының Майқұдық шағынауданындағы үйлердің бірінде тұратын әйелдер мен қазақстандық танымал боксшы, Олимпиада чемпионы Данияр Елеусіновтың жұбайы арасында жанжал туындаған. Көрші әйелдердің айтуынша, олар көршісінің шабуылына ұшыраған. Ал спортшының жары бұл жағдайды тұрмыстық кикілжің деп бағалайды.

Анасы мен қызының сөзінше, кіреберісте басталған сөзге келу аз уақыттың ішінде төбелеске ұласқан. Жанжал барысында көршісі біреуін ішінен ұрып, шашынан жұлды деп мәлімдейді.

— Ол алдымен балағат сөз айтып, кейін мені ішімнен ұрып, шашымнан жұлды. Шынын айтқанда, жанжалдың неден басталғанын өзіміз де түсінбей қалдық, - деді арызданушылардың бірі.

Оқиғадан кейін екі көрші әйел де полицияға жүгініп, соққы алғанын тіркеткен. Олардың айтуынша, бұған дейін бұл отбасымен іс жүзінде араласпаған әрі ешқандай келіспеушілік болмаған.

Ал жанжалға қатысқан әйел жағдайды басқаша түсіндіреді. Оның сөзінше, бұл – егде жастағы туысына қатысты айтылған сөздерден кейін туындаған тұрмыстық сипаттағы дау.

— Бұл – кәдімгі тұрмыстық жанжал. Әңгіме барысында дауыс көтеріліп кетті. Менің ойымша, бұл жағдай күйеуімнің танымалдығына байланысты әдейі ушықтырылып отыр, - деді ол.

Сондай-ақ әйелдің өзі де полицияға арыз жазғанын айтып, қазір істің қаралуын күтіп отыр. Қарағанды облыстық Полиция департаментінде аталған оқиға бойынша қылмыстық іс тіркелгенін хабарлады.

— Осы жылдың 27 қаңтарында полиция органдарына көршілер арасында жанжал болғаны туралы хабарлама түсті. Жәбірленушілер денсаулыққа келтірілген зиянның ауырлық дәрежесін анықтау үшін сот-медициналық сараптамадан өтуге жіберілді. Қазіргі уақытта қажетті сараптамалар мен тергеу әрекеттері тағайындалып, істің барлық мән-жайын анықтауға бағытталған жан-жақты тергеу жүргізіліп жатыр, - деп хабарлады ведомствоның баспасөз қызметі.

Сараптама қорытындысы шыққаннан кейін іс бойынша заң талаптарына сәйкес түпкілікті процессуалдық шешім қабылданады.

Еске салсақ, осыған дейін Қарағандыда танымал спортшы Серік Сәпиев пен оның орынбасары арасында да жанжал туындап, қоғамдық резонансқа ұласқан еді.