“Корё қандастар“ және K hearts. Неліктен Вячеслав Ким Alatau City ді дамытуға қосымша 100 миллион доллар салмақ?

Qazaq24.com, Tengrinews.KZ дереккөзінен алынған мәліметтерге сүйене отырып мәлімдеме жасады..

Сеулде визитканы екі қолмен, иіліп тұрып береді, ал маңызды келіссөздерден кейін саусақтарымен K-heart белгісін көрсетеді.

14-16 қыркүйек аралығында Сеулде Қасым-Жомарт Тоқаевтың мемлекеттік сапары өтті. Ол Оңтүстік Кореяға президент Ли Чжэ Мённің шақыруымен барды. Бағдарламада жоғары деңгейдегі келіссөздер, чебольдармен кездесулер (бір отбасы немесе әулет бақылайтын оңтүстіккореялық бизнес-конгломераттар) болды, ал 16 қыркүйекте алғашқы "Орталық Азия - Корея Республикасы" саммиті өтті. Сонымен қатар, қазақстандық United Group Alatau холдингі де бизнес өкілдерімен кездесулер өткізді.

Tengrinews.kz тілшісі бұл күндерді делегациямен бірге өткізіп, кореялық компаниялардың Alatau City-ге не ұсына алатынын және Вячеслав Кимнің неліктен Alatau қаласында ғылым, білім және инновациялық жобаларды дамытумен айналысатын жаңа AÑSA HUB көпфункционалды хабына 100 миллион доллар инвестиция салуды ұйғарғанын білді.

14 қыркүйек: ортақ тамыр және K-hearts

Бірінші күн жабық залдардағы бизнес-кездесулерден басталды. Ірі қонақүйдің келіссөз бөлмелеріндегі корпорация атаулары жазылған тақтайшалар бірінен соң бірі ауысып, визиткалар екі қолмен, құрметпен иіліп беріліп жатты.

United Group Alatau және оңтүстіккореялық Hyundai Motor Company өкілдері Сеулдегі келіссөздер алдында визитка алмасып жатыр. Фото: ©️ Tengrinews.kz / Ақбота Сіләм

United Group Alatau-дың алғашқы кездесуі Оңтүстік Кореяның ең ірі Upbit криптобиржасының операторы Dunamu компаниясымен өтті. Жаһандық бизнес бойынша атқарушы директор Чхве Вон Сок әріптестерін таныстырып, амандасқан соң, кенеттен қазақы нақышта жылы қадам жасады:

"Біз Кореяда мектеп кезінен, тарих оқулықтарынан ата-бабаларымыздың - корейлер мен қазақстандықтардың (шамасы, Қазақстандағы этникалық корейлер туралы - ред. ескертпесі) - тамыры бір екенін білеміз. Бізді кезінде солай оқытты, біз туыстығымызды әрдайым жадымызда ұстаймыз", - деді Чхве мырза.

Алыс елдегі қатаң ресми келіссөз бөлмесінде жылылық сезілді. Тек бұл жолы мұндай жақындық белгісін біз емес, кореялық қаржыгерлер бірінші болып білдірді.

Dunamu жаһандық бизнес бойынша атқарушы директоры Чхве Вон Сок. Фото: ©️ Tengrinews.kz / Ақбота Сіләм

Корей тарапы соңғы айларда БАҚ-тан Alatau City туралы мақалаларды жиі көретінін айтады. Жаңа қала мен Alatau City Bank-тің цифрлық төлемдерді дамыту жоспарлары Dunamu-ды осы үстел басына алып келген.

Анықтама: Alatau City - 2024 жылы Алматы облысында Жетіген ауылы мен іргелес аумақтар негізінде құрылған жаңа технологиялық қаланы дамыту жобасы. Қала Алматы мен Қонаев арасында орналасқан, оның ауданы шамамен 88 мың гектарды құрайды. 2050 жылға дейінгі бас жоспар бойынша аумақ төрт ірі ауданға - іскерлік, білім беру және медициналық, өнеркәсіптік-логистикалық және туристік аймақтарға бөлінеді. 2026 жылы Алатау үшін басқару, инвестиция тарту, бизнесті, қаржылық технологияларды және қалалық инфрақұрылымды дамытудың ерекше шарттарын қарастыратын "қарқынды дамитын қала" арнайы құқықтық режимі заңнамалық түрде бекітілді.

Фото: ©️ Tengrinews.kz / Ақбота Сіләм

Кейін кореялық серіктестер өз еліндегі қатаң реттеуге байланысты криптовалюта саласындағы жаңалықтарды енгізу қиын екенін ашық мойындап, Қазақстанның цифрлық сервистерді қаншалықты жылдам дамытып жатқанына таңғалысты.

"Біз Alatau City-дің бүкіл Орталық Азияның цифрлық активтер хабына айналуын қалаймыз. Болашақтың барлық технологиясы қаланың іргетасына бастан-аяқ қалануы тиіс", - деді бұған қатысты Вячеслав Ким.

Анықтама: Вячеслав Ким - қазақстандық кәсіпкер, Kaspi.kz негізін қалаушылардың бірі, ірі акционері және директорлар кеңесінің төрағасы. Бизнеске 1990 жылдардың басында келген. 1993 жылы "Планета электроники" электроника және тұрмыстық техника дүкендер желісінің негізін қалады, ол кейіннен Қазақстандағы ең ірі желілердің біріне айналды. Кейінірек оның негізгі бизнесі Kaspi болды. Сонымен қатар 2025 жылы Вячеслав Ким Alatau City Bank-ті (бұрынғы Jusan Bank) сатып алды, ол қазір "United Group Alatau" АҚ арқылы басқарылады. Alatau City қаласын дамытуға белсенді атсалысып жүр.

Вячеслав Ким (сол жақтан екінші) және Юрий Цхай (сол жақтан үшінші). Фото: ©️ Tengrinews.kz / Ақбота Сіләм

Әзіл де айтылмай қалмады: делегация құрамына қарап отырып, United Group Alatau негізін қалаушы корейлермен кездесуде алғаш рет Ким текті бірде-бір адамды жолықтырмағанын атап өтті.

"Есесіне біздің командада Пак және Чхве текті адамдар көп", - деп кореялық серіктестер де тапқырлық танытып, әзілмен жауап берді.

Кездесу қорытындысы бойынша цифрлық активтер саласындағы ынтымақтастықты дамыту туралы меморандумға қол қойылды.

Фото: ©️ Tengrinews.kz / Ақбота Сіләм

Одан кейін үстел басына Hyundai Motor Group делегациясы отырды. Қазақстандықтардың көбі үшін Hyundai тек автомобильдермен байланысты.

Фото: ©️ Tengrinews.kz / Ақбота Сіләм

Ал Кореяның өзінде бұл - құрылыс, логистика, қаржы және қалалық технологиялармен айналысатын 70-тен аса компаниядан тұратын алпауыт құрылым. Сондықтан олардың өкілдерімен әңгіме седандар мен кроссоверлерден емес, мүлдем басқа тақырыптан басталды.

Қазақстан тарапы Alatau City-ді Smart City және Urban Air Mobility жобаларына алаң ретінде ұсынды.

Анықтама: Smart City (ақылды қала) - көлік қозғалысын, коммуналдық инфрақұрылымды, қауіпсіздікті, энергия тұтынуды және қалалық сервистерді басқару үшін цифрлық технологиялар, датчиктер, деректерді талдау жүйелері мен автоматтандыру қолданылатын қалалық орта тұжырымдамасы. Urban Air Mobility (UAM) немесе қалалық әуе мобильділігі - қалаларда қысқа қашықтыққа жолаушылар мен жүк тасымалдау үшін шағын әуе кемелерін, соның ішінде тік ұшып-қонатын электрлі аппараттарды (eVTOL) пайдалану.

Hyundai компаниясын ақылды көлік, цифрлық сервистер және қалалық инфрақұрылым қызықтырды.

Hyundai Motor Company командасы. Фото: ©️ Tengrinews.kz / Ақбота Сіләм

"Біздің Smart City саласында тәжірибеміз мол: Кореяда бұл "Сэмангым" жобасы. Сондай-ақ біз Таяу Шығыста, Азия мен Еуропада жұмыс істейміз. Hyundai үшін Қазақстан - Орталық Азиядағы аса маңызды стратегиялық плацдарм. Біз Alatau City жобасын келешек қалаларын салу үлгілерімізді енгізудің тірек нүктесі ретінде қарастырамыз", - деді Ли Джэ Ён.

Hyundai өкілдері бөлек Multiplex Hub тұжырымдамасын пысықтауды ұсынды - бұл көлік, инфрақұрылым және қалалық сервистерді біртұтас жүйеге біріктіру.

Ли Джэ Ён - Hyundai Motor Company-дағы Smart City Promotion бөлімінің басшысы. Фото: ©️ Tengrinews.kz / Ақбота Сіләм

Тараптар Alatau City қаласының жалпы келбеті қандай болуы керек екенін талқылады. Ал соңында Вячеслав Ким кореялық серіктестерге он жыл алға көз тастауды ұсынды:

"Біз Alatau-дағы Iconic Towers ғимаратының 68-қабатында отырып, күннің батқанына қарап тұрып, бұл күнді үлкен жобаның бастауы ретінде еске алатын боламыз".

Анықтама: Iconic Towers - футуристік кешен, ол тек Alatau City-дегі ғана емес, бүкіл Қазақстанның оңтүстігіндегі ең биік ғимаратқа айналуы тиіс. Биіктігі 272 метр болатын бұл нысан Алматының қазіргі рекорды - Esentai Tower-ден (162 метр) 110 метрге асып түспек.

Iconic Towers эскизі. Tengrinews.kz-ке жобаны әзірлеушілер ұсынған

Қазақстандық кәсіпкер Юрий Цхай. Фото: ©️ Tengrinews.kz / Ақбота Сіләм

Hyundai өкілдері бұл идеяны бірден қолдады.

Фото: ©️ Tengrinews.kz / Ақбота Сіләм

Ал ортақ фотоға түсетін уақыт келгенде, кореялық тарап күтпеген жерден K-heart - әйгілі кореялық жүрекше белгісін көрсетті.

Фото: ©️ Tengrinews.kz / Ақбота Сіләм

K-pop пен дорамалар арқасында бұл ишара Кореядан тыс жерлерге де баяғыда танылған, бірақ іскерлік келіссөздерде ол бәрібір ерекше көрінді. Қазақстандық делегация бұл бастаманы тез іліп әкетті: санаулы секундта қатаң кадр айтарлықтай жандана түсті.

Бұл уағдаластықтарға кейінірек нүкте қойылды: тараптар ынтымақтастық туралы меморандумға қол қойып, ниеттерін ресми түрде бекітті.

15 қыркүйек: экран алдындағы телефондар, протокол ескертулері және ірі келісімшарттар

Келесі күні таңертең әлгі қонақүй маңындағы жағдай айтарлықтай өзгерді.

Көшелерде Сеул полиция жасақтары кезекшілікте тұрды, ал қиылыстар ара-тұра үкіметтік кортеждердің өтуі үшін босатылып жатты.

Фото: ©️ Tengrinews.kz / Ақбота Сіләм

Видео ©️ Tengrinews.kz

Қауіпсіздік шаралары күшейтілді, өйткені қонақүйде Қазақстан Президенті Қасым-Жомарт Тоқаев пен Корея Республикасының премьер-министрі Хан Сон Сук қатысқан Қазақстан-Корея іскерлік дөңгелек үстелі отырысы ашылды.

Фото: ©️ Tengrinews.kz / Ақбота Сіләм

Кіреберісте күзет әрбір қонақтың бейджін тізіммен мұқият тексеріп жатты. Тексеруден өткен соң, барлығы үшінші қабаттағы кең фойеге тап болды, онда іскерлік қарбалас қызып тұрды.

Фото: ©️ Tengrinews.kz / Ақбота Сіләм

Қазақстандық және кореялық кәсіпкерлер бір-бірінің қолдарын қысып, визитка алмасып, келіссөздер жүргізіп жатты.

Фото: ©️ Tengrinews.kz / Ақбота Сіләм

Бір сәтте әңгімелер сап тыйылды: үлкен кинетикалық экранда Alatau City туралы ролик көрсетіле бастады.

Панельдер қозғалып, бейне көлемді болып көрінді - смартфондар бірінен соң бірі көтерілді.

Фото: ©️ Tengrinews.kz / Ақбота Сіләм

Тұсаукесерден кейін қатысушылар негізгі залға шақырылды. Қазақстандық делегация бір-бірімен қызу амандасқаны сонша, протокол қызметіне орындарына тезірек жайғасуды сұрағап, бірнеше сыпайы ескерту жасауға тура келді.

Фото: ©️ Tengrinews.kz / Ақбота Сіләм

Залға Қасым-Жомарт Тоқаев пен Хан Сон Сук кіргенде ресми бөлім басталды. Президентіміз екі елдің өнеркәсіптік ынтымақтастығы туралы айтып, кореялық компанияларды Қазақстанның инфрақұрылымын салуға және дамытуға қатысуға шақырды.

"Кореялық компаниялар күрделі жобаларды тез, сапалы әрі озық технологиялар арқылы іске асыруымен танымал. Қазіргі таңда Қазақстан инфрақұрылымды жаңғыртудың маңызды кезеңіне қадам басты. Біз көлік, коммуналдық шаруашылық инфрақұрылымынан бастап тұрғын үй және әлеуметтік нысандарға дейінгі барлық бағытта құрылыс қарқынын жандандыруды жоспарлап отырмыз. Мұны Президент лауазымындағы басым міндеттерімнің бірі деп санаймын. Мақсатымыз – Қазақстанды алып құрылыс алаңына айналдыру", - деді Қасым-Жомарт Тоқаев.

Сурет: Ақорданың баспасөз қызметі

Екі елдің тауар айналымы былтыр үш миллиард доллардан асты. Тоқаевтың айтуынша, бұл көрсеткішті екі есеге арттыруға болады.

Осы сәтте Alatau City жобасындағы кореялық негізгі бағыттар айқындала бастады. KIND компаниясы K-Smart Town жобасы, KAIST - білім беру және зерттеу инфрақұрылымы, ал Korea Airports Corporation - қалалық әуе мобильділігімен айналысады. Кейін нақты жобалардың тізімі тіпті ұзара түсті. Alatau City үшін бірден бірнеше келісімге қол қойылды:

Alatau City Authority мен Hyundai Greenfood өндірістік-логистикалық кешен салу туралы келісім жасасты. G2 Power компаниясымен жасанды интеллект негізіндегі мониторинг жүйелерін өндіру туралы меморандумға қол қойылды. AMK Ceratech компаниясымен суды өнеркәсіптік тазартуға арналған элементтер шығару мәселесі бекітілді. KEUMJEONG HI-TECH компаниясымен иілімді желдеткіш құбырларын шығару туралы уағдаластық жасалды. Vitrosys Inc компаниясымен ағаштар мен тұқымдарды клондау зертханасын құру мақұлданды. Global Green Growth Institute (GGGI), Alatau City Authority және Caspian Group экологиялық стандарттар туралы үшжақты меморандумға қол қойды.

Саммитте жаңа қала жобалары талқыланып жатқанда, Alatau City Сеул орталығындағы экрандардан да көрсетілді. Қысқа бейнероликте Қазақстан атынан Барыс, ал Корея атынан Жолбарыс көрсетілді. Олар бірлесіп, қаланың төрт ауданына сәйкес Alatau City картасы мен логотипін төрт бөліктен құрастырды.

Анықтама: Alatau City (Алатау қаласы) төрт мамандандырылған ауданға бөлінеді деп жоспарланған: Gate - қаржы және іскерлік орталығы, Golden - білім, ғылым және медицина орталығы, Growing - өнеркәсіп және логистика орталығы, Green - туристік және рекреациялық кластер.

AÑSA HUB үшін 100 миллион доллар

16 қыркүйекте "Орталық Азия - Корея Республикасы" бизнес-саммитінде United Group Alatau негізін қалаушы Вячеслав Ким Alatau City-де AÑSA HUB жобасының іске қосылғанын жариялады.

Анықтама: AÑSA HUB - білім, ғылым, инновация, мәдениет және спорт саласындағы жобаларды қаржыландыратын көпфункциялы хаб.

Ким бұл жобаға өзінің жеке қаражатынан 100 миллион доллар бөлетінін мәлімдеді.

"Қазақстан бизнесті дамыту мен өркендетуге бірегей мүмкіндіктер ұсынып отыр. Kaspi.kz секілді бизнес-модельдердің басқа елдерде дәл осылай жұмыс істеуі екіталай десек, артық айтқандық емес. AÑSA HUB-ты құру – менің еліме деген алғысым мен ризашылығымның көрінісі. Мен Қазақстанның әлемге өз таланттарының дамуына барлық жағдай жасайтын, озық ойлы ел ретінде танылғанын қалаймын. Қазақстан мен Alatau City білім алуға немесе инновациялық жобаларды дамытуға ұмтылған дарынды жандардың басын қосатын орталыққа айналуы үшін бар күшімді саламын", – деді Вячеслав Ким.

Фото: ©️ Tengrinews.kz / Ақбота Сіләм

Хабтың төрт бағыты болады:

білім беру және инфрақұрылым; ғылымды дамыту және коммерцияландыру; инновациялық жобаларға арналған венчурлық инвестициялар; ғылым, өнер, мәдениет және спорт саласындағы гранттар.

Бұл ретте өтінімдер қабылданбайды: AÑSA HUB қаржыландырылатын жобаларды өз бетінше іздеп, іріктейтін болады.

Ким өз сөзінде Корея мен Орталық Азияның университеттерін, мемлекеттік құрылымдары мен бизнесін жобаны бірлесіп дамытуға шақырды.

"Бізде "диаспора" деген ұғым жоқ"

Саммит соңында әңгіме Сеулдегі осы үш күндік сапар басталған тақырыпқа - Қазақстандағы корё-сарамға қайта оралды.

Анықтама: "Корё-сарам" сөзбе-сөз аударғанда "Корё адамы" дегенді білдіреді және бұрынғы КСРО елдеріндегі этникалық корейлердің өзін-өзі атауы болып табылады. Қазақстанда 100 мыңнан аса корей тұрады, олардың арасында 1937 жылы Қиыр Шығыстан депортацияланғандардың ұрпақтары бар. 2027 жылдың күзінде олардың Қазақстанға қоныс аударғанына 90 жыл толады.

Қасым-Жомарт Тоқаев жиналғандар алдында сөйлеген сөзінде ортақ тарихты еске салды:

"Келесі жылы біз корейлердің Қазақстан аумағына қоныс аударғанына 90 жыл толуын атап өтуге дайындалып жатырмыз. Содан бері олар еліміздің толыққанды азаматына айналды. Бізде Конституция бойынша "диаспора" деген ұғым жоқ. Ата заңымыздың преамбуласында: "Біз - Қазақстанның біртұтас халқымыз" деп жазылған. Корей ұлтындағы азаматтарымыз Қазақстанның әлеуметтік-экономикалық дамуына орасан зор үлес қосып келеді, бұған біз әрине қуаныштымыз және ризамыз".

Содан кейін Қасым-Жомарт Тоқаев Вячеслав Ким туралы жеке тоқталып өтті:

"Ақпарат ретінде айта кетейін, Forbes тізіміне сәйкес, Қазақстан Республикасының ең дәулетті адамы - Ким мырза, ол осында отыр. Ол елімізді цифрландыруда төңкеріс жасап, Қазақстанды бұл бағытта айтарлықтай ілгерілеткен Kaspi.kz финтех-банкінің басшысы".

Президенттің мемлекеттік сапары аясындағы келіссөздердің сеулдік кезеңі қомақты уағдаластықтар пакетімен аяқталды. Енді бұл келісімдер Alatau City-де және бүкіл ел бойынша зауыттарға, цифрлық платформалар мен хабтарға айналуы тиіс.

Жоспарланған дүниелер қашан жүзеге аса бастайтынын елге оралғанда көре жатармыз. Мүмкін, бір күні сол Iconic Towers ғимаратының 68-қабатынан тамашалайтын болармыз.

Авторы: Ақбота Сіләм

Аударған: Дина Шәріпхан