“Көшпенділер қаласы“: қазіргі көрінісі қандай және кімге тиесілі

Кезінде бұл жерде кино түсірілген, ал декорациялар Алматы облысының танымал туристік орнына айналды. Бүгінде "Көшпенділер қаласы" кешенінің жай-күйі қандай - Tengri Travel анықтап көрді.

"Көшпенділер қаласының" қазіргі көрінісі қандай?

"Көшпенділер қаласы" бастапқыда "Көшпенділер" (2005) фильміне арналған ауқымды декорациялық алаң ретінде пайда болды. Мұнда ортағасырлық көшпенділер қаласы стиліндегі - сол дәуірдің атмосферасын беруі тиіс ағаш құрылыстар, дуалдар, мұнаралар мен өзге де элементтері бар қоныс бой көтерді.

Алайда фильм түсірілімі аяқталған соң алаң бұзылмады. Уақыт өте келе ол киножобаның бір бөлігі ретінде емес, серуендеуге және фотосессия жасауға арналған ерекше атмосфералық орын ретінде келушілерді қызықтыратын аймақтың басты көрікті жерлерінің біріне айналды.

Фото: Қонаев әкімдігі ұсынған

Кешен Іле өзенінің сол жағалауындағы 5,8 гектар аумақты алып жатыр. Өзекті мәліметтер бойынша, оның теңгерімдік құны 15,4 миллион теңгеге бағаланады. Пайдаланылған жылдары "Көшпенділер қаласы" айтарлықтай өзгерді: құрылымдар тозған, архитектуралық элементтердің бір бөлігі жоғалған, ал кешеннің бастапқы кейпі ішінара ғана сақталған.

Фото: Қонаев әкімдігі ұсынған

Ұзақ уақыт бойы "Көшпенділер қаласы" Шәкен Айманов атындағы "Қазақфильм" ұлттық киностудиясының теңгерімінде болды. Бірақ 2025 жылы кешеннің жаңа иесі пайда болды - ол сыйға тарту шарты бойынша Қонаев қаласының меншігіне ресми түрде берілді.

Осылайша, иесі ауысқаннан кейін нысан қала жауапкершілігіне өтті.

Көпжылдық тарихында "Көшпенділер қаласы" тек "Көшпенділер" фильміне ғана емес, басқа да туындыларға декорация болды. Мұнда "Дневной дозор" фильмінің кейбір сахналары түсірілсе, кейін бұл локация Jah Khalib-тің "Медина" бейнебаяны үшін пайдаланылды. 2025 жылы кешенге кинематографистер тарапынан тағы сұраныс артты - мұнда The Golden Empire ("Алтын империя") халықаралық сериалының түсірілімдері өтті.

Қонаев әкімдігі ресми сауалға берген жауабында бұған дейін "Көшпенділер қаласы" аумағында шағын архитектуралық жұмыс жүргізілгенін хабарлады. Оларды Қонаев әкімдігінің "Қонаев көркейту" шаруашылық жүргізу құқығындағы мемлекеттік коммуналдық кәсіпорны жеке жалға алушымен бірлесіп атқарған.

Қала әкімшілігі бұл жерде күтіп ұстау және абаттандыру бойынша қажетті жұмыстар тұрақты түрде жүргізіліп тұратынын хабарлады. Бұл ретте әкімдік түсірілім үшін жасалған декоративтік құрылымдар уақыт өте келе қалпына келтіру мен реконструкцияны қажет ететінін айтып отыр.

Дегенмен, әзірге бұл жұмыс қашан жүргізілетіні, болжамды бюджеті мен түпкілікті жобасы анықталған жоқ. Осылайша, кешен келушілерді қабылдап, туристік орын мәртебесін сақтап отыр, бірақ оның алдағы дамуы қолданыстағы құрылыстарды жаңарту мен қалпына келтіру жоспарының жүзеге асуына байланысты болмақ.

Бізді Google-дың негізгі дереккөздер тізіміне қосыңыз