Коттеджі мен автокөлігі бар зейнеткер 85 мың теңге жалақысы бар қызын сотқа берді

Балқашта өз қызынан сот арқылы алимент өндіріп алуға тырысқан зейнеткердің талап-арызы қанағаттандырылмады. Сот ер адам мұқтаж жандар санатына жатпайтыны және өзін-өзі асырауға жеткілікті қаражаты бар деген қорытындыға келді, - деп хабарлайды Tengrinews.kz Жоғарғы соттың баспасөз қызметіне сілтеме жасап.

Балқашта өз қызынан сот арқылы алимент өндіріп алуға тырысқан зейнеткердің талап-арызы қанағаттандырылмады. Сот ер адам мұқтаж жандар санатына жатпайтыны және өзін-өзі асырауға жеткілікті қаражаты бар деген қорытындыға келді, - деп хабарлайды Tengrinews.kz Жоғарғы соттың баспасөз қызметіне сілтеме жасап.

Ресми мәліметтерге сәйкес, Балқаш тұрғыны қызынан өзін асырауға ай сайын 10 АЕК (43 250 теңге) көлемінде алимент өндіру туралы талап арыз түсірген. Өтінішінде ол күн көрісі мен дәрі-дәрмек сатып алу үшін қосымша материалдық көмекке мұқтаж екенін, алайда қызы оған қолдау көрсетпейтінін көрсеткен.

"Неке (ерлі-зайыптылық) және отбасы туралы" Кодекске сәйкес, кәмелетке толған балалар еңбекке жарамсыз және көмекке мұқтаж ата-аналарын асырауға міндетті.

Алайда істі қарау барысында Балқаш қалалық соты талап қоюшының 128 229 теңге көлемінде зейнетақы алатынын, сондай-ақ оның меншігінде екі қабатты тұрғын үй мен Mitsubishi Montero Sport автокөлігі бар екенін анықтады.

Қызы талап арызды мойындамады. Ол екі баланы жалғыз өзі тәрбиелеп отырғанын, оларды асырауға алимент алмайтынын және сатушының көмекшісі болып 85 мың теңге жалақыға жұмыс істейтінін түсіндірді.

Оның айтуынша, әкесі коттеджде жалғыз тұрады, көлігі мен тұрақты зейнетақысы бар, сондықтан қосымша материалдық көмекке мұқтаж емес. Сонымен қатар, дәрі-дәрмектерден оған тек дәрумендер ғана тағайындалған.

"Сот зейнеткер емделуге жұмсалатын тұрақты шығындар, тұрақты күтімнің қажет екені немесе өмірлік қажеттіліктерін алу үшін қолда бар қаражаттың жеткіліксіз екені туралы сенімді дәлелдер ұсынбағанын атап өтті. Сондай-ақ, ер адамға ұлы материалдық көмек көрсетіп отырғаны анықталды", - делінген сот хабарламасында.

Шешім шығару кезінде сот талап қоюшының зейнетақы мөлшері ең төменгі жалақыдан асатынын және тараптар арасында туындаған араздық қарым-қатынас талап арыз беруге себеп болуы мүмкін екенін ескерді.

Нәтижесінде сот қызынан алимент өндіруге негіз жоқ деген қорытындыға келіп, талап арызды қанағаттандырудан бас тартты.

Шешімге шағым жасалған жоқ және ол заңды күшіне енді.

Google News арқылы жаңалықтарымызды қадағалаңыз