Қостанай әкімі кәсіпкерді сотқа берді

Қостанай әкімі № 120 Қостанай – Рудный қала маңындағы автобус бағытына қызмет көрсету шартына байланысты жеке кәсіпкердің үстінен сотқа шағым түсірді, деп хабарлайды Tengrinews.kz облыстық сотқа сілтеме жасап.

Істі Қостанай облысының мамандандырылған ауданаралық экономикалық соты қарады. Әкім жолаушылар мен багажды тұрақты автомобильмен тасымалдауды ұйымдастыру туралы шартты бұзуды талап еткен.

Сот талқылауы барысында тараптар дауды медиация тәртібімен реттеді. Келісім шарттарына сәйкес, "Б." ЖК № 120 Қостанай – Рудный қала маңындағы тұрақты бағытына 2026 жылғы 31 желтоқсанды қоса алғандағы мерзімге дейін қызмет көрсетуді жалғастырады. 2027 жылғы 1 қаңтардан бастап тараптардың өзара келісімі бойынша шарт тоқтатылады.

Сондай-ақ кәсіпкер шарттың тоқтатылуына сотта дауласпауға және ол аяқталғаннан кейін әкімге мүліктік және қаржылық талаптар қоймауға міндеттелді.

Ал Қостанай әкімі шартты бұзу туралы талабынан бас тартты.

Сот тараптардың келісімін бекітіп, іс бойынша өндірісті тоқтатты.

Сот ұйғарымы әлі заңды күшіне енген жоқ.

Еске сала кетейік, бұған дейін Өскемен тұрғыны "Казцинк" кәсіпорнындағы апаттан кейін қала әкімін сотқа берді. Ол төтенше жағдай кезінде билік тұрғындарға қауіптің бар-жоғын және қалай әрекет ету керектігін түсіндірмегенін мәлімдеді. Нәтижесінде әкімдік халықты құлақтандырудың нақты ережесін әзірлеуге келісті.

Google News арқылы жаңалықтарымызды қадағалаңыз