Кубада 10 миллион адам жарықсыз қалды

Кубаның барлық халқы — 10 миллион адам — ұлттық ауқымдағы блэкаут салдарынан электр қуатынан ажырап қалды. Бұл мемлекеттегі энергетикалық дағдарыс АҚШ-тың мұнай блокадасы жағдайында ушыға түсті, деп хабарлайды dw.com.

Дүйсенбі, 16 наурызда UNE мемлекеттік электр желілері операторы Кубада электр энергиясының толық өшкенін мәлімдеді. Осылайша, аралдың барлық тұрғыны жарықсыз қалды.

«Қазіргі уақытта электрмен жабдықтауды қалпына келтіру шаралары қабылдануда», — делінген UNE компаниясының X әлеуметтік желісіндегі хабарламасында.

Reuters агенттігі Кубадағы бұл блэкауттың алдында электр қуатының бірнеше рет сөнуі болғанын еске салады. Кейбір жағдайларда кубалықтар бірнеше тәулік бойы жарықсыз қалған. Осыған байланысты 14 және 15 наурызда елде наразылық шаралары өтіп, кей жерлерде көше тәртіпсіздіктеріне ұласты. 14 наурызға қараған түні наразылық білдірушілер тобы Морон қаласындағы билеуші Коммунистік партияның штаб-пәтеріне шабуыл жасаған.

Энергетикалық дағдарыстың ушығуы

Кубадағы экономикалық және энергетикалық дағдарыс АҚШ тарапынан жасалған мұнай блокадасы салдарынан айтарлықтай қиындады. Аралды энергиямен қамтамасыз ету негізінен ескірген мұнай электр станциялары арқылы жүзеге асырылады. Соңғы уақытқа дейін Кубаға мұнай жеткізетін негізгі ел Венесуэла болған еді. Алайда АҚШ-тың бұл елге жасаған шабуылынан және ағымдағы жылдың қаңтар айында оның басшысы Николас Мадуроны тұтқындағаннан кейін, Каракас кубалықтарға мұнай жеткізуді тоқтатты.

Сонымен қатар, Вашингтон Кубаға мұнай сататын елдерге жоғары баж салығын енгізумен қоқан-лоқы көрсетті. АҚШ Президенті Дональд Трамп Куба оның Иранмен соғыс пен Николас Мадуроны биліктен тайдырудан кейінгі кезекті жоспары болатынын мәлімдеді.

Куба Президенті Мигель Диас-Канель ақпан айының басында АҚШ блокадасын «фашистік, қылмыстық және геноцид жасауға бағытталған» деп айыптаған болатын. Дегенмен, 13 наурызда ол энергетикалық дағдарыстың ушығуына байланысты АҚШ-пен келіссөздер басталғанын алғаш рет ресми түрде мойындады.

Дональд Трамптың Куба туралы мәлімдемесі

The New York Times басылымының 16 сәуірдегі (сәуірде жарияланған дерекке сілтеме жасай отырып) хабарына қарағанда, Дональд Трамп журналистермен кездесуде «Кубаны иелену оған үлкен мәртебе болатынын» айтқан.

«Кубаны алу. Менің айтқым келгені — оны азат ету, иелену. Мен онымен қалағанымды істей аламын деп ойлаймын. Қазір бұл өте әлсіреген ел», — деп келтіреді басылым Ақ үй басшысының сөзін.

16 наурызда жарияланған NBC News телеарнасына берген сұхбатында Куба Премьер-министрінің орынбасары Оскар Перес-Олива «Куба АҚШ компанияларымен, сондай-ақ АҚШ-та тұратын кубалықтармен және олардың ұрпақтарымен икемді сауда қарым-қатынасына дайын» екенін атап өтті.

Бүгін, 10:19