Лиссабондағы тергеу: ақаулы сымарқан және басқа да бұзушылықтар анықталды

Алдын ала мәліметке сүйенсек, апатқа тартқыш сымарқанның үзілуі себеп болған. Португалияның Авиациялық және теміржол апаттарының алдын алу және тергеу басқармасының (GPIAAF) мәлімдеуінше, фуникулер сымарқаны ақаулы болған және жолаушылар тасымалы үшін сертификатталмаған. 

– Сымарқан Gloria трамвайында пайдалану үшін CCFL-дің қазіргі талаптарына сәйкес келмеді, – делінген 35 беттік есепте.

Есепте сондай-ақ сымарқанның техникалық жағынан жарамсыз болғаны және оны 2022 жылы Лиссабонның трамвай және фуникулер оператор-компаниясы Carris сатып алғаны айтылған. Carris инженерлері кабельдің жағдайын қадағаламады және қауіпсіздік инспекциясын жүргізбеді, деп қорытындылады мамандар.

Компания фуникулер мен трамвайларға техникалық қызмет көрсету бөлімінің басшысын жұмыстан шығарғанын мәлімдеді. 

Сымарқан жарамсыздығы – анықталған жалғыз мәселе емес. Кабель үзілген кезде фуникулер жүргізушісі пайдаланбақ болған апаттық тежеу жүйесі тиісті және дер кезінде іске қосылмады, әрі алдын ала сынақтан өтпеген. Басқарма әзірге жиналған ақпараттың «толық емес» екенін және тергеу ары қарай жалғасатынын атап өтті.

Қорытынды есеп келесі жылы шығады деп күтіліп отыр.

Еске сала кетсек, қыркүйек айының басында Лиссабонда туристер арасында танымал «Глория» фуникулері рельстен шығып кетті.

Португалия билігі көптеген адам қаза тауып, жарақат алған «Глория» фуникулеріндегі апатқа байланысты ұлттық аза тұту күнін жариялады.

Апаттан қаза тапқандардың басым бөлігі шетел азаматтары еді.

Айта кетсек, «Глория» фуникулері – Португалия астанасының төлқұжатындай саналады және елдің ұлттық ескерткіші ретінде танылған.