Лукойл шетелдік активтерін Gunvor Group компаниясына сатады

Ресейлік мұнай компаниясы «Лукойл» өз шетелдік активтерін Gunvor Group Ltd компаниясына сатуға алдын ала келісімге келгенін хабарлады.
Бұл шешімді ресейлік компания кейбір мемлекеттердің «Лукойл» және оның еншілес компанияларына енгізген санкциялары себеп деп түсіндірді, деп хабарлайды Forbes.ru.

Пресс-релизде айтылғандай, Gunvor Group LUKOIL International GmbH компаниясын сатып алуға ұсыныс жасаған. Бұл компания «Лукойлдың» 100% еншілес ұйымы болып, халықаралық активтерге ие. Өз кезегінде «Лукойл» басқа әлеуетті сатып алушылармен келіссөздер жүргізбеуге міндеттенген.

Мәміле шарттарының негізгі ережелері тараптар арасында келісілген. Алайда, міндетті келісімшартқа қол қою Gunvor тарапынан АҚШ Қаржы министрлігінің Шетел активтерін бақылау басқармасы (OFAC) рұқсатын және басқа мемлекеттердегі лицензиялар мен келісімдерді алуға байланысты. Тараптар қажет болған жағдайда OFAC лицензиясын және басқа рұқсаттарды ұзарту арқылы «Лукойл» халықаралық активтерінің операциялық жұмысын және банктік қызметін үздіксіз қамтамасыз етуге уәде берді.

Сатылым LUKOIL International GmbH компаниясының шетелдік активтерін қорғау және кейбір мемлекеттердің енгізген шектеулеріне байланысты жүргізілетін болады. 2025 жылғы 22 қазанда АҚШ OFAC «Роснефть» пен «Лукойл», сонымен қатар олардың еншілес компанияларына санкциялар енгізген. Сол сияқты, қазан айының ортасында Ұлыбритания да ресейлік мұнай компанияларына қатысты шектеулер енгізді.

Осыған байланысты, «Лукойл» 27 қазан күні өз халықаралық активтерін сатуға шешім қабылдағанын хабарлады. Компания бұл мәмілелерді OFAC лицензиясы аясында жүзеге асыруға ниетті екенін айтты.

Сарапшылардың бағалауынша, «Лукойлдың» шетелдік активтері 12–15 миллиард доллар шамасында. Дегенмен санкциялық қысым мен мәжбүрлі сатылым нәтижесінде активтер нарықтық бағадан 50-70% жеңілдікпен сатылуы мүмкін, яғни, соңғы баға бастапқы құнның шамамен үштен біріне тең болуы ықтимал.

«Лукойлдың» негізгі акционері – ресейлік миллиардер Вагит Алекперов. 2022 жылы сәуірде Алекперов компания президенттігінен кеткен, сол кезде Ұлыбритания оның үстіне санкция енгізген.

Gunvor әлемдегі ірі трейдерлердің бірі, оны құруға ресейлік миллиардер Геннадий Тимченко қатысқан. 2014 жылы Тимченко санкциялардан қорқып, Gunvor-дың 44%-ын серіктесі Торбьерн Торнквистке сатты.