Мадуроға қатысты соттың басталу күні және АҚШ тың Венесуэла мұнайын сатудан түскен табысы белгілі болды БАҚ

Нью-Йорктің федералды соты Венесуэла президенті Николас Мадуро мен оның жұбайы Силия Флореске қарсы есірткі саудасы туралы іс бойынша сот процесін 2027 жылдың 1 маусымына белгіледі, деп хабарлайды Tengrinews.kz.

CNN ақпаратынша, тыңдау барысында Николас Мадуро да, Флорес те сөз сөйлеген жоқ. Екеуі де өздерін кінәлі деп санамайды. Егер алқабилер олардың АҚШ-қа кокаин жеткізу мақсатындағы қастандыққа қатысы бар деген айыптау дәлелдерімен келіссе, олар өмір бойына бас бостандығынан айырылуы мүмкін.

Федералды округтік судья Элвин Хеллерстайн маусым айында сот талқылауы басталғанға дейін тараптардың құпия ақпаратқа қатысты мәселелерді реттей алатынына күмән келтіріп, бұл процестің ұзаққа созылуы мүмкін екенін атап өтті.

63 жастағы Мадуро мен оның 69 жастағы жұбайы Силия Флорес қаңтардың басынан бері Бруклиндегі түрмеде отыр. Оларды АҚШ әскерилері түнгі рейд кезінде Каракастағы үйінде ұстап, Нью-Йоркке жеткізген болатын.

Financial Times биыл АҚШ Венесуэла мұнайын сатудан 13 миллиард доллардан астам табыс тапқанын хабарлады. Бұл ретте басылым сарапшылары бұл қаражат түскеннен кейін оның тағдыры не болғаны әлі күнге дейін белгісіз екенін айтады.

Экономистер санкциялардың бір бөлігі алынып тасталғанына қарамастан, Венесуэла экономикасының қалпына келу белгілері салыстырмалы түрде әлсіз болып қала беретінін көрсетіп отыр. Олардың бағалауынша, бұл АҚШ-тың мұнай сатудан түскен барлық табысты Каракасқа қайтармағанын білдіруі мүмкін.

Вашингтон бұл қаражаттың пайдаланылуына қатысты әртүрлі түсініктемелер беріп отыр: АҚШ мұнай кірістерінің "сақтаушысы" ретінде сипатталған жарлықтан бастап, президент Дональд Трамптың Америка Құрама Штаттары Венесуэла мұнайынан "көп ақша тауып жатыр" деген мәлімдемесіне дейін.

Трамптың қаңтардағы бастапқы жарлығында бұл қаражат Венесуэла үкіметінің меншігі болатыны және АҚШ үкіметінің шоттарында "сақтаушы ретінде және мемлекеттік өкілеттіктер аясында" сақталатыны қарастырылған болатын.

Алайда АҚШ Энергетика министрлігі бұл қаражат "Америка халқы мен Венесуэла халқының мүддесі үшін бөлінеді" деп мәлімдеді.

Америкалық шенеуніктер мұнай қаражатын бақылау Венесуэланың жаңа көшбасшысы Делси Родригеске қысым көрсету үшін пайдаланылғанын алға тартады.

Google News арқылы жаңалықтарымызды қадағалаңыз