Мадьяр Зеленскийден Дружба құбыры арқылы мұнай транзитін қалпына келтіруді сұрады

АСТАНА, 21 сәуір – Sputnik. Венгрияның болашақ премьер-министрі Петер Мадьяр Украина басшысы Владимир Зеленскийден "Дружба" мұнай құбыры арқылы Ресей мұнайын транзиттеуді қалпына келтіруді сұрады.

"Украина президентіне үндеу жасауға дайынмын: <...> егер "Дружба" мұнай құбыры мұнай тасымалдауға жарамды болса, онда оны уәде етілгендей ашуды сұраймын. <...> Біз ешқандай бопсаға жол бермейміз", - деді ол журналистердің сұрақтарына жауап бере отырып.

Бұған дейін Венгрия үкіметінің қазіргі басшысы Виктор Орбан Будапешт Еуроодақтың 90 миллиард еуро көлеміндегі кредитін бұғаттауды тоқтатса, Украина дүйсенбі күні-ақ жеткізілімдерді қайта бастауға дайын екені туралы Брюссельден ақпарат алғанын мәлімдеді.

Украина 27 қаңтарда "Дружба" құбыры арқылы Ресей мұнайының Словакия мен Венгрияға транзитін тоқтатып, мұны құбырдың зақымдануымен түсіндірген. Будапешт пен Братислава "Дружба" жұмыс істеп тұр деп есептейді, ал транзиттің тоқтатылуын Киев қабылдаған саяси шешім әрі бопсалау деп санайды.

Жауап ретінде Венгрия Украинаға дизель отынын жеткізуді тоқтатты, сондай-ақ ЕО кредитін бұғаттады. Ал Словакия Еуропалық комиссия бұл жағдайға көз жұма қарай берсе, Ресейге қарсы жаңа санкциялар пакетін қолдамайтынын мәлімдеді.