Дружба құбыры бойынша жеткізілім өзгеріп, мұнай баламалы бағыттарға ауысты

— Енді мұнай баламалы бағыттар арқылы жеткізіледі. Усть-Луга портынан 100 мың тонна, ал Каспий құбыр консорциумынан (КҚК) 160 мың тонна жөнелтіледі. Тасымалдау бағыттарын қайта құру жүк жөнелтушілермен келісілді және өндірістік қажеттілік болып табылады. Бұл өзгерістер мұнай өндірудің жылдық жоспарының орындалуына әсер етпейді. Қолданыстағы көлік инфрақұрылымы экспорттың тұрақтылығын қамтамасыз етіп, шикізатты әлемдік нарыққа үздіксіз жеткізуге мүмкіндік береді, — деді Энергетика министрлігінің ресми өкілі Әсел Серікпаева.

Еске сала кетейік, бұған дейін ҚР Энергетика министрлігі «Дружба» мұнай құбыры жүйесі арқылы Германияға мұнай транзитіне қатысты БАҚ-та тараған ақпаратқа түсініктеме берген болатын.

Ведомство қазіргі уақытта ресейлік тараптан Атырау — Самара — «Дружба» бағыты бойынша қазақстандық мұнай транзитіне қандай да бір шектеулер енгізілгені туралы ресми хабарлама түспегенін растаған еді.

Алайда РФ вице-премьері мамырдан бастап Қазақстан мұнайы Германияға «Дружбадан» басқа бағыттармен жеткізілетінін мәлімдеді.

РФ Энергетика министрлігі мен «Транснефть» компаниясы ағындарды қайта бағыттау бойынша жұмыс істеп жатқаны нақтыланды.