Маңғыстауда компания басшылығы азаматтардың 303 млн теңгесін заңсыз тартқан

АЛМАТЫ, 3 желтоқсан – Sputnik. Маңғыстау облысында "Өзен көлік құрастыру зауыты" ЖШС басшылығына қатысты тергеу аяқталды, деп хабарлайды Қаржылық мониторинг агенттігі.

Мекеме басшылығына азаматтардың қаражатын үлескерлік құрылыс ретінде заңсыз тартты деген айып тағылған.

"Екі жыл бойы компания басшылығы Жаңаөзен қаласында "Astana Rich Village" тұрғын үй кешенінің құрылысын қажетті рұқсат құжаттарынсыз, жобалық-сметалық құжаттамасыз, мемлекеттік сараптама мен авторлық қадағалаусыз жүргізген", - дейді агенттік.

Азаматтардың қаражатын тарту мақсатында түрлі интернет-ресурстарда пәтерлердің нарықтан төмен бағамен сатылатыны туралы жарнама орналастырылған.

"23 азаматпен жалған алдын-ала сатып алу-сату шарттары жасалған. Заңсыз тартылған қаражаттың жалпы көлемі 303 млн теңгеден асты. Түскен ақша құрылыс материалдарын сатып алғандай көрініс жасап, кәсіпорын кассасынан қолма-қол ақшаға айналдырылып, шын мәнінде жеке қажеттіліктерге жұмсалған", - дейді ведомство.

Тұрғын үй құрылысы аяқталмаған. Сот санкциясымен күдіктілерге тиесілі мүлікке – тұрғын үй, пәтер, 2 автокөлік және 3 жер учаскесіне тыйым салынды.

Күдіктілердің бірі қамауға алынды, екіншісіне бұлтартпау шарасы ретінде кепіл қолданылды.