Машина жасау саласын қолдау күшейеді

Сенат төрағасы Мәулен Әшімбаев Қазақстан машина жасаушылар одағы Үйлестіру кеңесінің отырысына қатысып, сөз сөй­леді. Кездесуге қаты­су­шы­лар саланың даму келешегіне тоқталып, оларды іске асыру жөнінде пікір алмас­ты. Сондай-ақ жиында биыл атқарылған жұмыс қорытындыланды.

Мәулен Әшімбаев іс-шараға қатысушыларға ілтипат білдіріп, Мемлекет басшысы Қазақстан халқына Жолдауында белгілеп берген өңдеу өнеркәсібінің басым бағыттарына назар аударды. Палата спикері оларды уақтылы әрі сапалы іске асырып, жаңа өндіріс орындарын ашу үшін зама­науи тәсілдерді қолдану, мем­лекеттік органдар мен бизнестің тығыз өзара іс-қимылы маңызды екенін атап өтті. Мұндай қадам саланың ішкі нарықтағы ұстанымын нығай­тып, оны халықаралық деңгейде дамытуға ықпал етеді.

«Президент Қасым-Жомарт Тоқаев биылғы Жолдауында өңдеу өнеркәсібін дамытудың маңызды екенін айрықша атап өтті. Жалпы, машина жасау ғылымды қажет ететін, күрделі және озық сала ретінде елдің индустриялық дамуының негізгі драйверлерінің бірі саналады. Бұл сектор экономиканың аралас салаларына мультипликативті әсер етеді. Сондай-ақ оның өнімдерінің қосылған құны жоғары екені белгілі. Сондықтан Парламент Мемлекет басшысы жүктеген міндеттердің орындалуы үшін дәйекті түрде саланы қолдау жүйесін қалыптастырып келеді», деді Сенат төрағасы.

Сондай-ақ ол сенаторлар Қазақстан машина жасаушылар одағымен бірлесіп әзірлеген машина жасауды дамытуға арналған заң жобасына ерекше мән бе­ріп, Палатаның осы бағыттағы жұмысына кеңірек тоқталды. Құжат автомобиль өнеркәсібін өркендетуге, салалық кластерлер құруға, арнайы экономикалық аймақ пен индустриялық аймақ­тарды дамытуға және дуалды оқытуға қатысты маңызды шараларды қамтиды.

Отырыс барысында Үйлестіру кеңесінің мүшелері белгілі бір нәтижелерге қарамастан, салада әлі де болса жетілдіретін тұстар бар екеніне назар аударды. Соның ішінде Қарағанды облысының Саран қаласында өткен машина жасауды дамыту мәселелері­не арналған дөңгелек үстелде айтылған бірқатар міндет жан-жақты сөз болды. Оларды Машина жасауды дамытудың 2024–2028 жылдарға арналған кешенді жос­пары аясында қосымша пысық­тау қажет. Нақты айтқанда, кадр тапшылығы, жабдықты жаңарту үшін заманауи технологиялар мен инвестициялар­дың жеткілік­сіз­дігі, импортқа тәуелділік сияқ­ты түйткілдер өте өзекті. Бүгінде мұнай-газ, тау-кен металлургиясы, энергетикалық машина жасау сияқты машина жасаудың бірқатар стратегиялық сегментінде оқшаулау деңгейі 20–30 пайызды құрайды. Ал білікті мамандарға деген қажеттілік 7 мың адамға жеткен.

Сонымен қатар іс-шарада ірі өнеркәсіптік жобалардың қыз­меті мен аралық нәтижелеріне, оқшаулау деңгейіне, жабдықты жаңғыртуға және шығарылатын өнім желісін кеңейтуге қатысты пікірлер мен ұсыныстар айтылды. Цифрландыру және заманауи технологиялық шешімдерді енгізу мәселелері де талқыланды.

Жалпы, отырысқа Премьер-министрдің бірінші орынбасары, Үйлестіру кеңесінің төрағасы Роман Скляр, «Қазақстан машина жасаушылар одағы» ЗТБ басқар­ма төрағасы Мейрам Пішембаев пен салалық министр­ліктер мен жетекші отандық кәсіпорын­дардың өкілдері қатысты.