Мәслихат ғимараты пайдалануға берілді

Тәуелсіздік күні қарсаңында Алматы облысы Кеген аудандық мәслихатының ғимараты пайдалануға берілді. Іргетасы өткен ғасырдың жетпісінші жылдарында қаланған бұл нысан жарты ғасырға жуық уақыт бойы жөндеу көрмеген еді. Былтыр жергілікті бюджеттен қажетті қаржы бөлініп, аз уақыт ішінде ескі ғимарат жаңа келбетке ие болды.

Кеген аудандық мәслихатының ғимараты 1976 жылы салынған. Нысан әбден ескіріп, тозғандықтан бірнеше жыл бұрын оны күрделі жөндеуден өткізу туралы шешім қабылданды. Ғимарат қысқа мерзім ішінде қайта қалпына келтіріліп, жаңа келбетке ие болды.

Едіге Тазабеков, Кеген ауылының тұрғыны:

- Бүгін көріп, өзім де қайран қалып отырмын. Қазіргі уақыттағы тура осы уақытқа сай жасалынғандығы, осы уақытқа ыңғайлы қылып жасалынғандығы көрініп тұр.

Алмасбек Нұғман, Кеген аудандық мәслихатының төрағасы:

- Күрделі жөндеуден кейін қазіргі таңда 23 мекеме осы ғимаратта отыратын болады. Оның 13-і мемлекеттік мекеме, 10-ы қоғамдық ұйымдар, кәсподақ ұйымдары және басқа да мекемелер осы жерде жұмыстарын жүргізетін болады.

Ескірген ғимаратты күрделі жөндеуден өткізу мақсатында үш жыл бұрын жергілікті бюджеттен 33 млн теңге бөлініп, жобалық-сметалық құжаттамасы жасалды. Осылайша, өткен жылдың Наурыз айында жаңғырту жұмыстары басталып кетті. Міне, енді Тәуелсіздік күні мерекесі қарсаңында тарихи ғимарат қайтадан халық игілігіне берілді.

Нұрбақыт Теңізбаев, Кеген ауданының әкімі:

- Жалпы біздің Кеген ауданында биылғы жылға дейін 8,5 млрд қаражат болып отырса, биылғы жылды біз 15,5 млрд теңгемен аяқтап отырмыз.

Соның 10 млрд теңгесі құрылыс жұмыстарына бағытталған. Нәтижесінде 15 елді мекенде ауылішілік жолдар жасалып, көше шамдары орнатылды. Мектеп, аурухана сияқты бірқатар әлеуметтік нысан күрделі жөндеуден өтті. Келер жылы Кегенде жаңа үйлер мен өрт сөндіру депосы, Қарқара ауылында медициналық пункт, ал Жылысайда мәдениет үйі пайдалануға беріледі.

Авторлары: Ардақ Айбарұлы, Аманжол Жөңкешов