“Мазақ қылды және өзі шабуылдады“ Нұрай ісі бойынша сотталушының күтпеген нұсқасы

Qazaq24.com, Tengrinews.KZ дереккөзінен алынған ақпаратқа сүйене отырып жаңалық таратты..

Шымкентте 21 жастағы Нұрай Серікбайдың өліміне қатысты сот процесі жалғасып жатыр. 28 шілдеде өткен отырыста сотталушы қайғылы оқиғаға қатысты өз нұсқасын айтты, деп хабарлайды Tengrinews.kz.

"Адам өлтіру", "Алып қашу" және "Сталкинг"

Сотталушы 28 жастағы Ш. А. Қылмыстық кодекстің үш бабы бойынша айыпталып жатыр:

99-баптың 2-бөлігі 5-тармағы бойынша – "Аса қатыгездікпен жасалған адам өлтіру""; 125-1-бап бойынша – "Некеге тұруға мәжбүрлеу"; 115-1-бап бойынша – "Сталкинг"". 35 пышақ жарақаты және бір жарым сағатта 76 қоңырау: бұған дейін не белгілі болды?

Бұған дейін прокурор айыптау актісін оқыды, ол үш эпизодтан тұрады.

Тергеу мәліметінше, 2025 жылдың жазында сотталушы Нұраймен танысып, күзде оны Алматыда ұрлап кеткен және некеге тұруға мәжбүрлеу үшін Түркістан облысындағы туыстарының үйіне апарған. Сол кезде қыздың ағалары полициямен бірге оны үйіне қайтарып алған.

Бұдан кейін, тергеу деректері бойынша, ер адам қыздың соңына түскен: бірнеше күн ішінде оған 154-тен астам рет қоңырау шалып, Алматыдағы үйі маңында аңдып жүрген.

2026 жылғы 11 қаңтарда кешке Шымкентте Нұрайдың ата-анасының үйі жанында ер адам оған 35 жерден пышақ жарақатын салған. Қыз оқиға орнында көз жұмды, ал күдікті екі күннен кейін ұсталды.

Соттың онлайн-отырысынан скриншот

"Мені мазақ қылды": сотталушының нұсқасы

Сот отырысы кезінде Ш. А. оқиға бойынша өз нұсқасын айтты. Ол алып қашу айыбын жоққа шығарып, 2025 жылдың қыркүйегінен бастап Нұраймен романтикалық қарым-қатынаста болғанын айтты. Оның сөзінше, қыз отбасын құру үшін Шымкентке өз еркімен баруға келіскен, алайда оның туыстары қарсы болған.

Айыпталушының айтуынша, ол қызға сөз салған, ал ол ұсынысын қабылдаған-мыс.

Сотталушы, сондай-ақ, сталкинг әрекеттерін де жоққа шығарды және айыптау актісіндегі жүздеген телефон қоңырауының қайдан шыққанын түсінбейтінін мәлімдеді. Ол бұл автоқоңыраулар болуы мүмкін деп отыр.

Анықтама: Автоқоңырау – бұл желі бос болмаған немесе қоңырау өтпеген жағдайда абонентке қайта хабарласу әрекетін автоматты түрде қайталайтын функция.

Оның айтуынша, Нұрай өзі оны Алматыға шақырған, бірақ ол келген кезде Шымкентке, үйіне кетіп қалып отырған.

"Нұрай мені Алматыға өзі шақырды. Оны туған күнімен құттықтауға келгенім есімде, бірақ ол мені мазақ ету нысаны ретінде қабылдады. Мен келгенде, ол өз үйіне кетіп қалатын. Бұл жағдай үш рет қайталанды. Мұның бәрі мені рухани азапқа және ұзаққа созылған психологиялық күйзеліске ұшыратты. Оның маған осылайша әдейі қорлық көрсеткісі келгенін түсіндім. Мен оны ешқашан аңдыған емеспін және соңына түскен жоқпын", – деп мәлімдеді сотталушы.

"Аффект жағдайында болдым": сотталушы адам өлтірген күнін қалай сипаттайды?

11 қаңтардағы оқиға туралы айта отырып, сотталушы Нұраймен қарым-қатынасты үзу және оған сақинасын қайтарып беру үшін кездесуге келгенін айтты.

Сотталушының сөзінше, қайғылы оқиға болған күні қолында екі пышақ болған. Ол Нұраймен кездесер алдында көліктің зат салғышынан оларды кездейсоқ тауып алғанын, қолына ұстап көріп, содан кейін механикалық түрде қалтасына салып, ұмытып кеткенін айтады.

"Бардачокты ашқанымда екі пышақты көрдім – үлкен аңшы пышағы мен жиналмалы пышақ. Оларды қарап тұрып, толстовкамның алдыңғы қалтасына салдым, кейін телефон ұстап, олардың қалтамда қалып қойғанын байқамай қалыппын", – деді айыпталушы.

Әрі қарай Ш. А. сотқа айырылысу туралы әңгімеден кейін Нұрай ашуланғанын, оны балағаттап, ұра бастағанын, содан соң бірінші болып пышақ салғанын айтып берді.

"Мен оған сақинаны беріп: "Айырылысайық. Сенімен сөйлесуге де, кездесуге де ешқандай құлқым жоқ" дедім. Ол сақинаны лақтырып жіберіп, менің кеудемнен ұрып, балағаттай бастады. Сол кезде қалтамдағы жиналмалы пышақты сезіп, оған: "Одан да мені пышақпен ұр" деп ұсындым. Ол бірінші болып менің оң бүйірімнен ұрды. Осыдан кейін мен аффект жағдайында және қатты рухани күйзелісте болдым. Одан кейін не болғаны есімде жоқ", – деді сотталушы.

Видеодан кадрлар

"Менің жүйкем сыр берген"

Жауап алу кезінде сотталушы Ш. А. 2019 жылдан бастап басынан алған жарақатынан кейін психикалық ауытқумен ауыратынын, сондықтан Нұрайға қалай пышақ жарақатын салғаны есінде жоқ екенін айтты.

"Сарапшылар маған "аралас мазасыз ойлар мен әрекеттер" диагнозын қойды. Мұның бәрі 2019 жылы бассейнге секіріп, басымды бетонға соғып, жарақат алғаннан кейін басталды. Содан бері менде осындай ұстамалар болып тұрады. Бұрын да жүріп-тұрып, ештеңе есімде қалмайтын кездер болған", – деді айыпталушы.

Анықтама: Бұл ретте ол Нұрай оның диагнозы туралы білмегенін айтты.

Жәбірленуші тарап адвокатының соққылар саны және қылмыс орнынан қалай кеткені туралы сұрағына сотталушы далада ғана есін жиғанын айтты.

"Нұрай мені пышақпен ұрғаннан кейін есімнен танып қалдым. Содан кейін не болғаны есімде жоқ. Далада есімді жидым, үстімнен қан ағып жатты, ал екі пышақ та қалтамда екен. Содан кейін жолға шығып, ақ түсті көлікті тоқтаттым, мені АІІБ-ға алып барды. Сол жерде ғана не болғанын білдім", – дейді Ш. А.

Адвокаттың бас тартқаны үшін қызды өлтірудің қажеті бар ма еді деген сұрағына сотталушы Нұрайды жақсы көргенін және оның өмірін қиюды қаламағанын айтып жауап берді.

Жауап алу соңында ол қаза тапқан өыздың ата-анасы мен туыстарынан, өз жақындарынан және барша қазақстандықтан кешірім сұрады.

"Нұрайдың ата-анасынан, бауырларынан, туыстарынан, сондай-ақ өз ата-анамнан кешірім сұраймын. Мұндай жағдай болады деп ешқашан ойламаппын. Барша Қазақстан халқынан кешірім өтінемін. Өз дертімнің кесірінен... емделмей, істі осындай жағдайға дейін жеткізгеніме өкінемін", – деді сотталушы.

Сот процесі жалғасып жатыр.

Іс хроникасы

Қайғылы оқиға 11 қаңтарда болды. Желіде тараған бейнебақылау камераларындағы жазбалардан ер адамның қызды аңдып жүргенін, қыз қашуға тырысып, қарсылық көрсеткенін, содан кейін ер адам оған пышақ жарақатын салып, оқиға орнынан қашып кеткенін көруге болады. 13 қаңтарда күдікті – өңірдің 28 жастағы тұрғыны қаладан 10 шақырым жерде ұсталды.

Ұсталған адам туралы Нұрайдың ағасы Сұлтан бөліскен мәліметтер БАҚ пен әлеуметтік желілерде ашу толқынын тудырды.

Күдікті оның қарындасын тойда танысқан 2024 жылдың жазынан бастап аңдығаны белгілі болды. Қыз оның тым белсенді көңіл білдіруінен сыпайы түрде бас тартқан, бірақ қазанда ер адам түбегейлі әрекеттерге көшкен.

"Ол телефонды тартып алып, көлікке отырғызып, Алматыдан Шымкентке алып кеткен. Нұрай үй киімімен болған, оған "соңымнан ермеңіз, мені аңдуды қойыңыз" деп айту үшін ғана шыққан. Ол үлкендерді әрқашан сыйлайтын, ал күдікті 28 жаста болған. Ол осыны пайдаланып, оны алып қашқан", – деп еске алды Нұрайдың ағасы Сұлтан.

Сол кезде Сұлтан мен үлкен ағасы қарындасын полиция шақырту арқылы ғана құтқара алған – ұсталған азаматтың туыстары Нұрайды келін ретінде жібергісі келмеген. Полиция қызды босатуға көмектесті. Бірақ кейін оның отбасы құқық қорғау органдарының немқұрайлылығына тап болды.

Қыздың туыстары адам ұрлау туралы полиция мен прокуратураға үш рет арыз жазған. Бірақ олар қабылданбады. Бірнеше айдан кейін қызды өлтіріп кетті.

Жағдайға Президент Қасым-Жомарт Тоқаев назар аударып, 20 қаңтарда Ұлттық құрылтай отырысында полицияның әрекетіне баға беруді тапсырды. Сол күні Шымкент полициясының бастығы Нұрлан Алмасбеков қызметінен босатылғаны, ал некеге тұруға мәжбүрлеу туралы істі тіркемеген қызметкерлерге қатысты салғырттық дерегі бойынша қылмыстық іс қозғалғаны белгілі болды.

Осыдан кейін әлеуметтік желілерде бейнежазба тарады, оны Шымкент полиция департаментінің бұрынғы қызметкерлері жариялады деген болжам бар. Жазбада Нұрай Серікбай өзін некеге тұру мақсатында ешкім ұрламағанын және сол күні күдіктінің көлігіне өз еркімен отырғанын айтады. Роликте Нұрай ер адамға ешқандай шағымы жоқ екенін айтқаны да бар.