Медеу жабық болғанымен алматылықтар сырғанақсыз қалмайды

Медеу мұз айдыны жөндеуге жыбалғанмен алматылықтар сырғанақсыз қалмайды.

Қазір қаланың сегіз ауданында ашық аспан астындағы сырғанақтар жұмыс істеп тұр. Әлеуметтік жобаның мақсаты – қала тұрғындарының қысты қызықты өткізуіне жағдай жасап, жастарды спортқа баулу.

Қала қонақтары мен тұрғындарының қыс қызығынан қапы қалмауы үшін биыл да мұз айдындары ашылды. Мегаполисте 20 сырғанақ алаңы бар. Олардың 11-і ақысыз. Орталыққа жүгірмей жақын жерде коньки тебу үшін мұз айдындары шаһардың барлық ауданынан салынды. Солардың бірі Жетісу ауданындағы «Гүлдер» саябағында орналасқан. Демалыс орны тұрғындардың күнделікті қызығына айналып үлгерді.  

Данияр Әлкебайұлы, Жетісу ауданы әкімінің орынбасары:

- Қазіргі таңда «Медеу» мұз айдыны кезекті жөндеу жұмыстарына жабылғанына байланысты, содан былтырғыға қарағанда адам көп. Енді бұл былайша айтқанда балалардың далада жай жүрмей, өйстіп кішкене мұз айдында тиімді өз уақыттарын өткізуге ықпалын тигізеді және денсаулығына бір серпін береді деген сенімдемін. 

Мұз айдындары таңғы оннан түнгі он бірге дейін істейді. Өзіңнің конькиің болса сырғанақ тебу тегін. Болмаса жалға аласыз. 

Әлия Меркебаева, Жетісу ауданының тұрғыны:

- Кішкентай ұлым бар, алты жаста. Күнде «сырғанаққа барайық, мама, сырғанаққа барайық» деп, соның келіп сырғанап жатады. Мына жастарға жақсы болды. Жастар түігілі өзімізге де жақсы болды. Қуанып жатырмыз.

Биыл тұрғындардың сұрауымен бұрынғы президент резиденциясының орнындағы бақ ішінен де сырғанақ ашылды.  Мұнда келушілер айдынның дәл ортасында тұрған шыршаны айнала қозғалады. Күнделікті 4 сеанс өтеді. Әр екі жарым сағат сайын арнайы көлік пен жұмысшылар айдынның бетін жылтыратып, су құйып мұздың қалыңдығын қадағалап отырады.

Нұрқанат Атажан, тілші:

- Мұз айдынында мектеп жасындағы бала да, жасы үлкен ересек те бар. Себебі кіру тегін, ал эмоция – бәріне ортақ. Мегаполис бойынша осындай 11 ақысыз сырғанақ алаңы бар. Айдынға келіп, алғаш коньки тебемін деушілерге осындай қосымша құралдар да қарастырылған.

Сырғанақ теуіп, спортпен сейіл құратындардың дені жастар. Ұйымдастурышлардың сөзінше, демалыс орнына келетіндердің саны, әсіресе кешкі уақытта көбейеді. Ал демалыс күндері бұл жерде толассыз адам.

Анель Қаламбек, студент:

- Алматы қаласындағы жаңадан ашылған мұз айдынына бүгін бірінші рет келіп тұрмын. Өзімнің сіңіліммен. Бізге ұнады. Өте керемет деп айтсам болады. Атмосферасы керемет. Жағымды әуен. Барлығы көңілді. Сосын Алматы қаласының ауа райы да өте қолайлы болып тұр, коньки тебуге.

Жансерік Мұсахан, студент:

- Біз осы мұз айдынына достарымызбен келген болатынбыз. Және де эмоциямыз өте жарқын болып тұр. Әрине, қыстың ең бір қызықты кездерінің бірі ғой бұл. Мұз айдыны, сноуборд.

Ашық аспан астындағы мұз айдындары наурыз айына дейін жұмыс істейді. Айта кетейік, бұқаралық спортты дамытуға және қала тұрғындарының бос уақытын тиімді өткізуге бағытталған бұл жоба 2017 жылдан бастап жүзеге асып келеді. Сол уақыттан бері оларға 2 миллионнан аса адам барып үлерген. Биыл да мыңдаған адамды қамтымақ.

Нұрқанат Атажан, Кенже Амраев, Сержан Жұмабаев