Ерте қамданған қапы қалмайды

Ауа райын болжаушылар Ертіс-Баян өңірінде келесі жылдың ақпан, наурыз айлары әдеттегіден 2 градусқа жылы болады деп болжап отыр. Бұл жазғытұрым қардың күрт еруіне әкеліп, су тасқыны мезгілін күрделендіре түсуі ықтимал.

Сурет: malim.kz

Павлодар облысында алдағы жылдың су тасқыны мезгіліне дайындық жұмысы жүргізіліп жатыр. Елді мекендерді су басу қау­пін барынша азайту мақ­са­тында облыс әкімінің қау­лы­сымен «Инженерлік жұмыс жос­пары» бекітілген.

– Жоспар аясында 30 шақы­рым­ға жуық қорғаныс және жол инфрақұрылым нысандары қал­пы­на келтіріліп, нығайтылды. 29 су өткізу құбыры орнатылып, жөндеуден өткізілді. Сондай-ақ елді мекендердегі арықтар мен су бұру арналары тазартылып, ретке келтірілді, – деп хабарлады өңірлік төтенше жағдайлар департаменті бастығының орынбасары Қайрат Шаймарденов.

Маман­­дардың ай­­туынша, Баянауыл, Ақтоғай аудан­да­рын­дағы елді мекендер ерекше бақылауда тұр. Баянауыл ауданында су тасқыны қаупін төмендету мақсатында Жаңажол, Қ.Сәтбаев ауылдарында суармалы жүйелерді қайта жаңарту жұмысы жүргізіліп жатыр. Атал­ған жобалар арқылы 3,6 мың гектар аумақта 23 млн текше метр­ден астам суды қабылдап, реттеу мүмкіндігі пайда болады.

Ал Ақтоғай ауданы Шолақ­сор ауылы маңында Сілеті өзе­ні­нің арнасын түзеу, терең­де­ту жұ­мысы атқарылды. Жалау­лы ауылында 200 млн текше метр көлемінде еріген қар суларын жинауға арналған 3 тоған қазылып, жер үйінділері жасалған. Ал Ертіс өзенінің ойпаң тұстарында жергілікті атқарушы органдардың күшімен жалпы ұзындығы 63,8 шақырымды құрайтын топырақ үйіндісі тұрғызылған.

Қазір төтенше жағдайлар департаментінің қызметкерлері жергілікті атқарушы органдармен бірлесіп, облыстың алдағы болуы ықтимал су тасқыны кезеңіне дайындығын бағалау мақ­сатында елді мекендерді аралап, тек­серу жұмысын жүргізіп жатыр.

– Жазғытұрым кезеңде ықти­мал төтенше жағдайлардың алдын алу және жою мақсатында департаментпен «КамАЗ» база­сын­­дағы 2 су сору автокөлігі, 5 «Skoda Kodiak» жедел-қызметтік автокөлігі, 1 «Toyota Hilux» базасындағы жедел әрекет ету автокөлігі, 6 аспалы қайық мо­торы, 2 үрлемелі қайық, 1 ұшқыш­сыз ұшу аппараты (дрон), 1 тентті жүк көлігі, 13 тасымалданатын мотопомпа, 1 тіркемелі мотопомпа сатып алынды. Барлық құтқару бөлімшелері су өткізбейтін арнайы қорғаныс костюмдерімен қамтамасыз етілді, – дейді департамент өкілі.

Ал «Қазгидромет» РМК Павлодар облыстық филиалының хабарлауынша, қазір өңір бо­йынша орташа жауын-шашын мөлшері өткен жылдың сәйкес кезеңімен салыстырғанда 76%-ға көп (2024 жылы – 13 мм, 2025 жылы – 23 мм). Топырақтың қазіргі қату тереңдігі орта есеппен өткен жылмен салыстырғанда 33%-ға жоғары (2024 жылы – 6 см, 2025 жылы – 8 см).

– Қараша айы әдеттегіден жылы болып тұр. Облыс бойын­ша орташа ауа температурасы нор­мадан 1 градусқа жоғары (-5,-6°С), жауын-шашын мөлшері – нормаға жуық (16–23 мм). Желтоқсанда ауа температурасы нормадан ауытқымай, орташа тәуліктік температура -10,-14 градус болып сақталады. Қаңтардағы температура да норма шегінде болады. Тек ақпан мен наурыз айларында ауа температурасы нормадан 1–2°С жоғары болады деп болжанады, – деп мәлімдеді «Қазгидрометтің» жергілікті филиалынан.

Павлодар облысы