Мемлекеттік органның қателігінен кейін қазақстандыққа жер құқығы қайтарылды

Азаматтық істер жөніндегі кассациялық сот кәсіпкерден ауданы 36 гектардан асатын жер учаскесін алып қою туралы шешімнің күшін жойды. Бұған мемлекеттік орган тарапынан рәсімдердің бұзылуы себеп болған, деп хабарлайды Tengri Home Азаматтық істер жөніндегі кассациялық соттың баспасөз қызметіне сілтеме жасап.

Поделиться

Сөз болып отырған 36,56 гектар жер учаскесі жеке кәсіпкерге ауыл шаруашылығы өнімдерін өндіру үшін берілген.

Жер ресурстарын басқару департаменті 2023 жылдың ақпанында жоспардан тыс тексеру жүргізіп, жердің мақсаты бойынша пайдаланылмай жатқанын анықтаған. Кәсіпкерге нұсқама беріліп, заң бұзушылықты жоюға бір жыл уақыт берілді.

Мерзім аяқталғаннан кейін мамандар учаскені қайта тексеріп, жердің әлі де пайдаланылмай жатқаны туралы акт жасаған. Осыдан кейін департамент жерді мәжбүрлеп алып қою туралы талаппен сотқа жүгінген.

Бірінші және апелляциялық сатыдағы соттар мемлекеттік органды қолдап, жерді алып қою туралы шешім шығарды. Алайда Кассациялық сот өзгеше тұжырымға келді.

Сот ақпаратынша, Жер кодексінде жерді мәжбүрлеп алып қоюдың нақты тәртібі қарастырылған. Мұндай талап арызбен сотқа жүгінбес бұрын, уәкілетті орган заңда көзделген әкімшілік жаза қолдану шараларын жүзеге асыруы тиіс.

Ауыл шаруашылығы мақсатындағы жерлерді ұтымсыз пайдаланғаны немесе пайдаланбағаны үшін Әкімшілік құқық бұзушылық туралы кодекстің 338-бабы бойынша жауапкершілік қарастырылған. Яғни, кәсіпкерге айыппұл салынуы немесе ескерту жасалуы керек еді. Алайда департамент сотқа жүгінер алдында кәсіпкер әкімшілік жауапкершілікке тартылмаған.

Осылайша, рәсімнің міндетті кезеңі орындалмаған.

Кассациялық сот кәсіпкердің шағымын қанағаттандырып, бірінші және апелляциялық сатыдағы шешімдердің күшін жойды және оның жер учаскесіне құқығын қалпына келтірді.

Кассациялық сот бұл шешім жердің мақсаты бойынша пайдаланылғанын мойындау емес, дәл осы жерді алып қою тәртібінің бұзылуымен байланысты екенін атап өтті.

Бізді Google-дың негізгі дереккөздер тізіміне қосыңыз

жер учаскесі жер қайтару Сот Сот төрелігі