“Мен оны кокос деп ойладым“: Қазақстан тарихындағы ең ірі кокаин ісі сотқа қайта жолданды

Қазақстан тарихындағы ең ірі кокаин партиясына қатысты қылмыстық іс сотқа дейінгі тергеу амалдары жанданғаннан кейін сотқа қайта жолданды. Сәуірде материалдар прокуратураға қайтарылып, кейін іс ҰҚК тергеушілеріне қайта түскен болатын. Tengrinews.kz атышулы істің қай кезеңде екенін анықтады.

Неге іс процестің соңғы кезеңі алдында кері қайтарылды?

30 сәуірде 1,1 тоннадан астам кокаин транзитіне қатысты қылмыстық іс аяқталуға жақын қалған еді. Алматыдағы алқабилер соты процестің соңғы кезеңіне өтуі тиіс болатын, дегенмен прокурор материалдарды қадағалау органына қайтаруды сұрады.

Сот өтінішті қанағаттандырып, іс Қылмыстық іс жүргізу кодексінің 321-бабына сәйкес алдын ала тыңдау өткізу үшін прокуратураға жолданды.

Анықтама: ҚР ҚІЖК-нің 321-бабы қылмыстық іс бойынша алдын ала тыңдау өткізу тәртібін белгілейді. Бұл шара аса ауыр қылмыстарға қатысты істер бойынша міндетті, ал басқа санаттар бойынша сотқа соттылық, істі прокурорға қайтару, іс жүргізуді тоқтату немесе тоқтата тұру, қылмыстық істерді біріктіру немесе бөлек шығару мәселелерін шешу, сондай-ақ тараптардың өтініштерін қарау қажет болған жағдайда жүргізіледі. Сот тиісті қаулы шығарады.

Іс қайта тергелді

Шілдеде Tengrinews.kz редакциясы Алматы прокуратурасынан материалдар ҰҚК тергеушілеріне қайта берілгенін анықтады. Осылайша, іс тергеу сатысына қайта оралды.

Қыркүйекте редакция істің барысын білу үшін Ұлттық қауіпсіздік комитетіне сауал жолдады. Енді ҰҚК тергеу аяқталып, материалдар сотқа қайта жіберілгенін хабарлады.

"Сотқа дейінгі тергеу аяқталды, материалдар Алматының қылмыстық істер жөніндегі мамандандырылған ауданаралық сотына жолданды", – деп хабарлады ҰҚК өкілдері.

Бұл ретте істің саралануы мен айыпталушылар саны өзгерген-өзгермегені туралы комитет ашып айтпады.

13 тонна кокаин ісінің мән-жайы

2025 жылдың қыркүйегінде ҰҚК Алматыда республика тарихындағы ең ірі кокаин партиясы тәркіленгенін хабарлады. Оның салмағы - 13 тонна 183 келі. Жүк бағыты Қазақстан арқылы үшінші елдерге транзитті көздеген. Алайда партия қайдан келгені белгісіз болды.

Сол кезде құқық қорғау органдары есірткі арнасын ұйымдастырды деген күдікпен екі шетелдікті ұстады.

Құнына келетін болсақ, ІІМ 2025 жылдың наурызында 600 грамм кокаинді 100 миллион теңгеге бағалаған. Осыған сүйенсек, Алматыда тәркіленген кокаин партиясының болжамды құны екі триллион теңгеден асуы мүмкін - 2 триллион 197 миллиард 167 миллион теңге.

Іс бойынша кімдер сотталып жатыр?

Сотталушылар қатарында Түркияның екі азаматы бар: О. М. және Я. У. Оларға Қылмыстық кодекстің екі бабы бойынша айып тағылды:

297-баптың 3-бөлігі бойынша – "Есірткі заттарын өткізу мақсатында аса ірі мөлшерде заңсыз тасымалдау". Бап санкциясы мүлкін тәркілей отырып, 7 жылдан 12 жылға дейінгі мерзімге бас бостандығынан айыруды көздейді. 286-баптың 4-бөлігі бойынша – "Есірткі заттарының аса ірі мөлшердегі контрабандасы". Бұл үшін олар 15 жылдан 20 жылға дейінгі мерзімге немесе өмір бойына бас бостандығынан айырылуы мүмкін.

Істі алқабилер соты қарады.

30 сәуірде Алматының қылмыстық істер жөніндегі мамандандырылған ауданаралық сотында прокурор Қылмыстық-процестік кодекстің 321-бабына сәйкес алдын ала тыңдау өткізу үшін материалдарды қадағалау органына қайтару туралы өтініш берді.

Төрағалық етуші судья өтінішті қанағаттандырып, аяқталуға жақын қалған іс қайтадан прокуратураға жолданды.

"Мен оны кокаин емес, кокос деп ойладым": сотталушы не деді?

Бұған дейін іс бойынша айыпталушылардың бірі, Алматыдағы түрік мейрамханасында менеджер болып істеген О. М. кінәсіздігін алға тартты. Ол Түркиядан және басқа елдерден тауар импорттау үшін әйелінің атына бизнес ашуды сұраған танысының құрбаны болғанын айтты. Сотталушының сөзіне қарағанда, танысы "көмектесуін өтінген", сөйтіп 2024 жылы отбасы "Point Dis Ticaret" ЖШС-ін ашқан.

Диффузорлар мен героин эпизоды

Көп ұзамай отбасы жалға алған қоймаға тауардың алғашқы партиясы – темір банкалардағы диффузорлар келеді. О. М. қораптарды кәдімгі тауар деп есептеп, ішінде жасырын нәрсе барын сезбегенін айтты. Кейін дәл осындай банкалардан неміс полициясы 450 келі героин тапқаны белгілі болды. О. М. "тыйым салынған заттар" туралы 2025 жылдың ақпанында ғана логистикалық фирмадан естігенін мәлімдеді.

Іс бойынша куәгерлер бірінің айтуынша, бұл туралы неміс кеденінің сайтында жазылған.

Фото: zoll.de Доминиканнан келген "кокостар"

Сондай-ақ сотталушының айтуынша, оның танысы Доминиканнан кокос жеткізуді жоспарлаған. Сотталушы заңды жеміс бизнесіне сенгенін және "кокос" сөзінің жаргондық мағынасын білмегенін айтты. Германияда жүк ұсталғаны туралы хабардан кейін ол келісімшартқа қол қоюдан бас тартып, ұйымдастырушымен байланысын үзген.

"Мен оны жеміс деп ойладым. Кокос, жеміс. Тек судья мырза "кокос" дегеннің "кокаин" екенін айтқанда түсінген болармын. Мен өмірімде ешқашан есірткі қолданған емеспін, тіпті білген де жоқпын", – деді ол.

О. М.-ның айтуынша, оның қатысуымен "кокостарды" жеткізу жүзеге аспаған.

Кокаин салынған қаптар тиелген палеттер / Фото: ҚР ҰҚК

2025 жылдың ақпанында О. М.-мен екінші сотталушы А.-ның інісі байланысқа шыққан. Дәмханадағы кездесуде ол кәсіпкер Түркияда ұсталғанын хабарлап, басқа фирманың қарыздарын өтеу үшін Point компаниясының шотынан ақшаны қолма-қол шығарып беруді сұраған, бірақ О. М. бас тартқан.

Бірнеше күннен кейін ҰҚК қызметкерлері оны мейрамханадағы жұмыс орнында ұстады. Күдікті кінәсін мойындаған жоқ.

Тағы оқыңыз: 13 тонна кокаинға қатысты іс прокуратураға қайтарылды

Google News арқылы жаңалықтарымызды қадағалаңыз

Жазылу