Midad Energy Лукойл активтерін сатып алуы мүмкін

Сауд Арабиясының Midad Energy компаниясы санкцияға ұшыраған «Лукойлдың» шетелдегі барлық активтерін сатып алу жөнінде алдын ала келісімге қол қойды.
Бұл туралы Reuters агенттігі хабарлады. Қаңтар айының соңында жасалған келісім «Лукойлдың» мақсатты халықаралық активтерін түгел қамтиды. Midad активтерді қолма-қол қаражатқа сатып алуға және АҚШ реттеушілерінің рұқсатын алғанға дейін ақшаны эскроу-шотта ұстауға келіскен. Рұқсат беретін органдар қатарында United States Department of the Treasury де бар.

Reuters дереккөздерінің айтуынша, саудиялық компания барлық реттеуші талаптарды орындау бағытында жұмыс жүргізіп жатыр. Сарапшылар бұл мәмілені саяси тәуекелі жоғары қадам ретінде бағалап отыр.

Еске салсақ, 29 қаңтарда «Лукойл» америкалық The Carlyle Group компаниясымен өзіне тиесілі LUKOIL International GmbH активтерін сату туралы келісім жасағанын мәлімдеген.

Компания мәміленің Қазақстандағы жобаларға әсер етпейтінін, активтер «Лукойл» тобының иелігінде қалып, қолданыстағы лицензиялармен жұмысын жалғастыратынын атап өтті. Бұған дейін Қазақстан Республикасының Энергетика министрлігі АҚШ Қаржы министрлігі жанындағы Office of Foreign Assets Control (OFAC) басқармасына Қазақстандағы жобалардағы «Лукойл» үлесіне қатысты ресми хат жолдаған болатын.