Миландағы Олимпиада ауылы таныстырылды

Миландағы Олимпиада ауылы спортшыларды қабылдауға дайындалып жатыр.

Мұнда 1700 адам орналасады. Олар үшін бір бөлмелі және екі бөлмелі номерлер қарастырылған. 40-тан астам мемлекеттен хоккей, шорт-трек, мәнерлеп және конькимен сырғанаудан жарысатын спортшылар қаңтардың 30-ы барады. Кешенде асхана, фитнес-орталық, емхана және демалыс аймағы бар. Жөндеу жұмыстары қаңтар айының басында аяқталады. Қысқы Олимпиада ойындары ақпанның 6-сында басталып, 22-сіне дейін жалғасады. Ал Паралимпиада ойындары наурыз айында өтеді.

Жәнібектің кәсіпқой мансабы қалай болады?

Жәнібектің спорттағы тағдыры қаңтардың сегізі күні шешіледі. Яғни, дәл сол датада В допинг сынамасы ашылады. Бұл туралы Қазақстан кәсіпқой бокс федерациясының президенті Рахымжан Ерденбеков мәлімдеді. Айта кетейік, қазақстандық кәсіпқой боксшының15 қарашада тапсырған допинг сынамасынан тыйым салынған мельдоний анықталған болатын. Ал 2 желтоқсанда VADA ұйымы боксшыға ресми түрде хат жолдап, Жәнібек Әлімханұлы мен Эрисланди Ларамен кездесуі өтпейтінін жариялады. Бұл жекпе-жекте үш титул сарапқа салынуы тиіс еді. Нәтижесінде Лараға басқа қарсылас тауып берді. Ал Жәнібек неге бұлай болғанын түсіне алмай отырғанын алға тартты. Айтуынша, 12 қарашада тапсырған алғашқы А сынағы таза шыққан. Спортшы сол кезде әлеуметтік желіде, тіпті,сынақ тапсыру сәтін де жариялаған болатын.

ЦИТАТА: Жәнібек Әлімханұлы, кәсіпқой боксшы

- Мен қай кезде де таза спортты қолдаймын. Бұл жаңалық мені қатты таңғалдырды. Алғашқы сынақта ешқандай тыйым салынған зат анықталған жоқ. Қоспаларды да өзгерткен емеспін. Екінші сынақтағы нәтиженің қалай шыққанын түсінбеймін, сондықтан қайта тексеруді сұрадым7 

Боксшылардың алдағы жоспары қандай? 

Нұрбек Оралбай жаңа салмаққа ауысады. Әлем чемпионы әрі Олимпиада жүлдегері бұдан былай 85 келіде өнер көрсетеді. Бұл жөнінде ұлттық құраманың бас бапкері Қайрат Сәтжанов мәлімдеді. Оның айтуынша, алдағы жылы біраз жігіт салмақтарын өзгертеді. Мәселен, Нұрбек Оралбай 85 келіге, ал, Дәулет Төлемісов 90 келіге көтеріледі. Ал аса ауыр салмақта жас боксшы Аслан Елдібайұлына үлкен үміт артылып отыр. Әр боксшы өз салмағын таңдап, нақты бағытын айқындағаннан кейін кешенді дайындыққа кіріседі. Өйткені алдағы жылы маңызды жарыстар көп. Арасындағы ең негізгісі деп күзде Жапонияның Нагоя қаласында өтетін Азия ойындарын айтуға болады. Сондықтан биылғы жылды жақсы қорытындыладық. Бірақ оған тоқмейілсімей және босаңысымай алдағы жылы да дәл осы қарқындағы жұмысты жалғасыру қажетпіз дейді бас бапкер.

Қайрат Сәтжанов, бокстан ұлттық құраманың бас бапкері:

- 2026 жылдың 4-25 қаңтары аралығында жалпы дене дайындығы бойынша Түркістан облысында оқу-жаттығу жиынын өткіземіз. Одан кейін бірқатар спортшыларымыз Испаниядағы турнирге аттанады. АҚШ құрамасы 14 боксшымызды Колорадо-Спрингс қаласына дайындалуға шақырды. Жыл сайынғы дәстүрлі Болгария, Мажарстан, Сербиядағы жарыстарда күшімізді сынап көрмекшіміз. Ал ең басты жарысымыз – қыркүйек айындағы Жапониядағы жазғы Азия ойындары болмақ.

Н. Аралбайұлы: қаржыны тиімді қолдану қажет 

Футбол клубтары халықтың қазынасына қол сала бермей, өздері ақша тауып үйрену керек. Бұл жөнінде Мәжіліс депутаты Нартай Аралбайұлы мәлімдеді. Оның айтуынша, биылдың өзінде осы мақсатта бюджетен 31,7 миллиард теңге бөлінді. Ал ең қымбат команда саналатын «Астана» квазимемлекеттік сектордан, яғни тағы да халықтың қаржысынан  5,3  миллиард теңге алды. Өкініштісі, аталмыш командалар өздігінен  инвесвтор тартуға, қосымша табыс табуға және шетелдік клубтар сияқты дамудың жаңа деңгейіне шығуға құлықсыз. Сондықтан Президент арнайы тапсырма беріп, қазір жекешелендіру жұмыстары қарқынды жүріп жатыр. Ал футбол клубтарынан үнемделген қаржы алдағы уақытта әлеуметтік мәселелерді шешуге және мұқтаж жандарды қолдауға жұмсалуы қажет дейді депутат.

Нартай Аралбайұлы, ҚР Парламент Мәжілісінің депутаты