Министрлік дәрі дәрмек саудасына қатысты жағымды жаңалық жариялады

Қазақстандықтар артық төлемсіз дәрі-дәрмек пен ем ала алады. Бұл тегін медициналық көмектің кепілдік берілген көлемі және міндетті әлеуметтік медициналық сақтандыру шеңберінде ұсынылатын медициналық қызметтер мен дәрілік препараттарды қосылған құн салығынан босату шеңберінде мүмкін болмақ, деп жазады Egemen.kz.

Фото: egemen.kz/Қырмызы Жұмағалиқызы

Үкімет қаулысының тиісті жобасын Денсаулық сақтау министрлігі жаңа жылдан бастап күшіне енетін жаңа Салық кодексін іске асыру аясында әзірлеген. Жобада медициналық қызметтер мен дәрілік заттардың тізбесін бекіту көзделген. 

Олардың өткізілуі мен импорты ҚҚС-тан босатылады.

Шара орфандық және әлеуметтік мәні бар ауруларды емдеуге, диагностикалауға, профилактикалауға және оңалтуға қатысты да қолданылады.
Қаулыны қабылдау:
● ҚҚС ескермей тегін медициналық көмектің кепілдендірілген көлемі (ТМККК) және МӘМС шеңберінде медициналық қызметтерді көрсетуге;
● сирек кездесетін және әлеуметтік мәні бар ауруларды емдеуге арналған дәрі-дәрмектерді қоса алғанда, дәрі-дәрмектерді салықтан босатуға;
● дәрілік заттарды түпкілікті тұтынушыларға өткізгенге дейін оларды әкелуге ҚҚС бойынша жеңілдік белгілеуге оң әсер етеді.

ҚҚС-тан босату медициналық ұйымдар үшін қаржылық жүктемені азайтуға, пациенттер үшін мүмкіндіктерді кеңейтуге және отандық фармацевтикалық компаниялар үшін қолайлы жағдайлар жасауға мүмкіндік береді.

Ведомство жеңілдіктер ТМККК, МӘМС тізбесіне кірмейтін немесе уәкілетті орган бекіткен орфандық және әлеуметтік мәні бар ауруларды емдеуге енбеген қызметтер көрсететін жеке медициналық ұйымдарға қолданылмайтынын ескертіп отыр. 

Айта кететін тағы бір маңызды жайт жеке секторда медициналық қызметтер көрсету, дәрілік заттар мен медициналық бұйымдарды өткізу үшін ҚҚС-тың төмендетілген мөлшерлемесі 2026 жылдан бастап – 5%,  2027 жылдан бастап 10% болып белгіленді.