Мобильді аударымдар тексерілді 115 мың адам бақылауға ілікті

АСТАНА, 10 маусым – Sputnik. Қаржы министрі Мәди Такиев мобильді аударымдарға жасалған тексерістің нәтижесін жариялады, деп хабарлайды Sputnik Қазақстан тілшісі.

Банктер жіберген ақпараттың негізінде 115 мың адам үш ай қатарынан 100 аударыммен 1 020 000 теңгеден астам ақша алған. Ал аударымдардың жалпы сомасы 1 триллион теңгеден асады. Осы ақшаның басым бөлігін - 670 млрд теңгені жеке тұлғалар аударған. Сондай-ақ мобильді аударыммен ақша алғандардың арасында 7 800 бейрезидент бар.

"Олар бойынша бақылауды күшейттік. Ақшаның қайдан келгенін және қайда жіберілгенін сұраймыз. Сосын жеке кәсіпкерлер де бар, олар 200 млрд теңгеге аударым жасаған. Барлығына ескерту жіберілді. Жазалау үшін емес, түсініктеме беру үшін жіберілді",-деді Такиев журналистерге берген сұхбатында.

Министрдің сөзінше, бақылауға іліккендердің арасында такси жүргізушілері мен курьерлер көп. Олар салық органдарына келіп, мобильді аударымдардың бақылауға алынғанын білмегенін айтқан.