Мобильді аударымдарды тексерудің жаңа ережелері осы аптада күшіне енеді: не білу керек

Алдағы жексенбіде, 8 қарашада Қазақстанда мобильді аударымдарды тексерудің жаңа ережелері күшіне енеді. Бұл ретте олар қазанда жасалған аударымдарға да қолданылады. Толық мәліметті Мемлекеттік кірістер комитеті (МКК) түсіндірді, деп хабарлайды Tengrinews.kz тілшісі.

Президенттің ең төменгі жалақы (ЕТЖ) мөлшерін 2027 жылдан бастап 110 мың теңгеге дейін көтеру туралы тапсырмасынан кейін, редакциямыз бұл шараның мобильді аударымдарды бақылау критерийлеріне қалай әсер ететінін анықтау үшін Қаржы министрлігіне ресми сауал жолдады. Себебі салық органдары тексеру жүргізетін аударымдардың шекті сомасы ЕТЖ негізінде есептелетін еді.

Министрлік Қаржы министрінің 23 қазандағы бұйрығымен аударымдардың шекті сомасы 12 ЕТЖ-дан 360 айлық есептік көрсеткішке (АЕК) өзгертілгенін мәлімдеді.

Осылайша, шекті мөлшер 1 020 000 теңгеден 1 557 000 теңгеге дейін ұлғайтылды.

Жаңа ережелер 8 қарашадан бастап қолданысқа енеді: не білу қажет?

Мемлекеттік кірістер комитетінің Tengrinews.kz редакциясының ресми сауалына берген жауабында бұйрық 2026 жылғы 8 қарашада күшіне енетіні айтылған. Алайда мобильді аударымдарды бағалау кезіндегі жаңа шекті мөлшер бүкіл төртінші тоқсан үшін, яғни қазаннан желтоқсанға дейінгі кезеңді қоса алғанда қолданылады.

"Бұйрықта қарастырылған аударымдардың шекті сомасы критерийін 12 еселенген ЕТЖ-дан 360 еселенген АЕК-ке ауыстыру жеке тұлғалардың жағдайын нашарлатпайды, керісінше жақсартатынын ескере отырып, 2026 жылдың IV тоқсанындағы мәліметтерді бағалау кезінде тұтастай 360 АЕК мөлшеріндегі жаңа критерийді қолдану туралы шешім қабылданды", - делінген комитет жауабында.

Бұл дегеніміз, бұйрықтың осы аптада ғана күшіне енетініне қарамастан, қазан, қараша және желтоқсан айларындағы аударымдарды бағалау кезінде бұйрық тек осы аптада күшіне енетініне қарамастан, 1 557 000 теңге мөлшеріндегі жаңа шекті сома қолданылады.

Мобильді аударымдарды тексеру: 2027 жылы не өзгереді?

Мемлекеттік кірістер комитеті 2027 жылдан бастап мобильді аударымдардың шегі 2027 жылғы 1 қаңтардағы АЕК мөлшеріне қарай есептелетінін еске салды. Бұл ретте жыл сайын бұйрыққа өзгеріс енгізудің қажеті болмайды: АЕК өзгеруіне байланысты сома автоматты түрде қайта есептеліп отырады.

Республикалық бюджет жобасына сәйкес, 2027 жылы АЕК-ті 4325 теңгеден 4693 теңгеге дейін ұлғайту жоспарланған. Осылайша, мобильді аударымдардың шегі 1 689 480 теңгеге дейін өсуі мүмкін. Әзірге бұл алдын ала сома: бюджет жобасы Құрылтайда түпкілікті мақұлдануы тиіс, содан кейін құжат Президентке қол қоюға жіберіледі.

МКК үш айлық кезең екі күнтізбелік жылды қамтыған жағдайды да (мысалы, 2026 жылдың желтоқсанынан 2027 жылдың ақпанына дейін) түсіндіріп өтті. Мұндай жағдайда бірыңғай шекті мөлшер қолданылады, ол тиісті кезеңді бағалау жүргізілетін жылдың 1 қаңтарындағы (яғни 2027 жылғы 1 қаңтардағы) АЕК бойынша есептеледі.

Мобильді аударымдар үшін кімдер тексерілуі мүмкін?

Комитет тексеру критерийлері - жіберушілердің саны мен бақылау кезеңінің ұзақтығы өзгермегенін атап өтті. Осылайша, салық қызметі тарапынан сұрақтар туындауы үшін мына бір мезгілде үш шарт бірдей орындалуы тиіс:

Жеке тұлға қатарынан үш күнтізбелік айдың әрқайсысында 100 және одан көп түрлі жөнелтушіден аударымдар түссе. Осы кезеңдегі түсімдердің жалпы сомасы 360 АЕК-тен асады - 2026 жылы бұл 1 557 000 теңге. Ақша кәсіпкерлік қызметке арналмаған жеке банктік шоттарға түссе.

Бұл ретте, аталған критерийлерге сәйкес келу азаматтың салық заңнамасын бұзғанын білдірмейді және шотқа түскен барлық ақшаны автоматты түрде кәсіпкерлік табыс деп тануға негіз болмайды.

Бұған дейін біз 1 қазаннан бастап Қазақстанда мобильді аударымдарды бақылау критерийлерінің өзгеретінін хабарладық. Бұрынғы ең төменгі жалақыға тәуелділіктің орнына, енді шекті мөлшер айлық есептік көрсеткішке байланысты болады.

Тағы оқыңыз: Салық органдары картаға жиі аударым жасалғаны үшін шотты бұғаттай ала ма? МКК жауабы

Бізді Google-дың негізгі дереккөздер тізіміне қосыңыз

Қосу