Халық қолдаса, жаңа Конституция қашан күшіне енеді?

Жаңа Конституция референдумда қабылданған жағдайда, 2026 жылғы 1 шілдеден бастап күшіне енеді. Бұл туралы жаңа Конституция жобасында айтылған, - деп хабарлайды Tengrinews.kz тілшісі.

Жаңа Конституция референдумда қабылданған жағдайда, 2026 жылғы 1 шілдеден бастап күшіне енеді. Бұл туралы жаңа Конституция жобасында айтылған, - деп хабарлайды Tengrinews.kz тілшісі.

Құжатқа сәйкес, егер жаңа Конституция референдумда мақұлданса, оны қабылдау күні мемлекеттік мереке болып бекітіледі.

Сондай-ақ, жаңа Конституция қабылданған жағдайда, Қазақстанның қазіргі Парламенті 2026 жылғы 1 шілдеге дейін жұмысын жалғастыратыны көрсетілген.

"Республикасының Конституциясы 2026 жылғы 1 шілдеден бастап күшіне енеді, бұған дейін қабылданған Қазақстан Республикасы Конституциясының қолданысы сол мезгілден бастап тоқтатылады. 1995 жылғы 30 тамыздағы Қазақстан Республикасының Конституциясына сәйкес қалыптастырылған Қазақстан Республикасының Парламенті өз өкілеттігін 2026 жылғы 1 шілдеден бастап тоқтатады", - делінген жоба мәтінінде.

11 ақпанда Конституциялық комиссия мүшелері Президент Тоқаевқа елдің жаңа Конституциясы жобасы бойынша атқарылған жұмыстың қорытындысын таныстырды.

Одан кейін Президент Қасым-Жомарт Тоқаев Конституциялық реформа бойынша референдум өткізу туралы жарлыққа қол қойды.

Жарлық мәтініне сай, Қазақстанда Конституциялық реформа жөніндегі референдум 15 наурызда, жексенбі күні өтеді.

Анықтама: Референдум - азаматтардың ең маңызды мемлекеттік, өңірлік немесе жергілікті мәселелер бойынша тікелей ерік білдіру нысаны (жалпыхалықтық дауыс беру). Референдум арқылы заңдар қабылданады, Конституцияға өзгерістер енгізіледі немесе шешуші саяси мәселелер қаралады. Әдетте референдумда қабылданған шешімдердің күші міндетті болады.

Конституциялық реформа жөніндегі комиссия (Конституциялық комиссия) Президенттің 2026 жылғы 21 қаңтардағы жарлығымен құрылған. Оның міндеті - конституциялық реформаны жүзеге асыруға қатысты ұсыныстар әзірлеу.

Бұған дейін Президент Парламент реформасы аясында Конституцияның шамамен 40 бабын өзгерту жоспарланғанын, алайда жұмыс барысында түзетулер бұдан да көп қажет екені белгілі болғанын айтқан.

Сілтемесіз жаңалық оқисыз ба? Онда Telegram желісінде парақшамызға тіркеліңіз!