“Менің ұлым тірі“: әскери қызметшінің әкесі оның Каспийде қаза тапқаны туралы ақпаратты жоққа шығарды

Қазақстандық Талғат Құлманов ұлы Маңғыстау облысындағы қайғылы оқиға кезінде қаза тапқаны туралы әлеуметтік желілерде тараған ақпаратты теріске шығарды, деп хабарлайды Tengrinews.kz тілшісі.

Бұған дейін әлеуметтік желілерде әскери борышын өтеп жүрген ұлы мен әкесінің телефон арқылы сөйлескен видеосы тарай бастаған болатын.

Бейнеқоңырау кезінде Талғат Құлманов көлікте отыр, ал оның ұлы отбасына хабарласу үшін телефонды енді ғана алғанын айтады. Олар жаңалықтарын бөлісіп, бір-бірінің амандығын сұрасады, ал соңында бір-бірін жақсы көретіндерін айтады. Әкесі мен баласының бұл әңгімесі 9 қыркүйекте болған.
Алайда кейбір пайдаланушылар бұл жазбаны Каспийдегі қайғылы оқиға алдындағы әке мен баланың соңғы сөйлесуі деп атаған.

Instagram-дағы бұл жарияланымды көру

TengriNews | Қазақстан жаңалықтары (@tengrinewskz) жарияланымы

Бүгін, 25 қыркүйекте Талғат Құлманов бұл ақпарат шындыққа жанаспайтынын хабарлады: оның ұлы тірі және әскердегі қызметін жалғастырып жатыр.

"Құрметті әлеуметтік желі пайдаланушылары! Ұлымның видеосы тарап жатыр. Онда оны Ақтаудағы қайғылы оқиға кезінде қаза тапты және бұл біздің соңғы сөйлесуіміз болды деп жазып жатыр. Осы ақпаратқа сенбеулеріңізді сұраймын. Ұлым - курсант, қазір ол қызметін өтеп жүр", - деді Құлманов.

Сондай-ақ ол Маңғыстауда қаза тапқан әскери қызметшілердің туған-туыстары мен жақындарына көңіл айтты.

"Туған-туыстары мен жақындары үшін осынау ауыр сәтте шын жүректен көңіл айтамын. Бұл қайғылы жағдай барша қазақстандықтың қабырғасын қайыстырды. Бізге, әскери қызметшілерге де оңай емес. Сондықтан жалған ақпарат таратпауды сұраймын", - деп үндеу жасады Талғат Құлманов.

24 қыркүйекте Маңғыстау облысында әскери-теңіз жаттығулары кезінде әскери қызметшілер Каспий теңізінде суға ағып кеткен. Олар Каспий теңізі жағалауында оқу-жауынгерлік тапсырмаларды орындап жатқанда, ауа райы күрт бұзылып, жел күшейген.

Бастапқыда 19 әскери қызметші суға кеткені хабарланған болатын. Кейін Маңғыстау облысының әкімдігі 17 адам екенін нақтылады.

Қайғылы оқиға салдарынан 14 адам қаза тапты, үш адам құтқарылды. Әскери қызметшілердің біреуі ауруханада жатыр.

Қайғылы оқиғаны тергеу үшін Үкіметтік комиссия құрылды. Оны премьер-министрдің орынбасары Қанат Бозымбаев басқарады. Комиссия қайғылы оқиғаның себептерін анықтап, қаза тапқандардың отбасыларына көмек көрсетуі тиіс.

Әскери қызметшілердің қаза болу дерегі бойынша соталды тергеп-тексеру басталды. Жоғары лауазымды бес басшы ұсталды. Тергеу басқа да тұлғалар ұсталуы мүмкін екенін жоққа шығармайды.

Президент Қасым-Жомарт Тоқаев қаза тапқан әскери қызметшілердің туған-туыстарына көңіл айтты. Мемлекет басшысы 25 қыркүйекті жалпыұлттық аза тұту күні деп жариялады.

Тағы оқыңыз: Каспийде не дұрыс болмады? Әскери-теңіз күштерінің бұрынғы бас қолбасшысы қайғылы оқиғаның ықтимал себептерін атады

Бізді Google-дың негізгі дереккөздер тізіміне қосыңыз