Мұнай бағасы 15% ға төмендеп, Brent баррелі 83 долларға түсті

Әлемдік нарықта Brent crude oil бағасы шамамен 15%-ға арзандап, баррелі 83 доллар деңгейіне дейін төмендеді.
Сауда барысында мұнай құны тіпті 82 доллардан да төмен түскен. Бағаның құлдырауы Дональд Трамп Ирандағы әскери қақтығысты тоқтату туралы мәлімдегеннен кейін басталған. Бұған дейін, 9 наурызда мұнай бағасы барреліне 119 долларға дейін көтерілген еді.

Wood Mackenzie компаниясының бас аналитигі Саймон Флауэрс мұнай бағасы біраз уақыт жоғары деңгейде сақталуы мүмкін екенін айтты. Оның пікірінше, қақтығыс аяқталған күннің өзінде жеткізілім тізбегін толық қалпына келтіру оңай болмайды.

Сарапшының айтуынша, порттар мен мұнай өңдеу зауыттарындағы қорларды жөнелту салыстырмалы түрде жылдам жүзеге асуы мүмкін. Алайда егер ұңғымалар ұзақ уақыт тоқтап тұрса, өндірісті толық қалпына келтіру бірнеше апта немесе айға созылуы ықтимал.