Нигерияда жоғалған 300 баланың жартысы табылмады

Нигерияда тапа тал түсте қаскүнемдер ұрлап кеткен 300 оқушының көбі әлі табылған жоқ. 

Билік тек 100 баланың, сосын тағы 50 шақтысы босатылғанын растады. Алайда қалған 100-ден аса оқушы, олармен қоса тағы 12 мұғалім ұшты-күйлі жоқ. 

Ал бала-шағасынан бір хабар болып қалам ма деп үміттенген ата-налар күніге мектеп алдын торуылдап жүр. 

Нигерияда адам ұрлау оқиғалары айтарлықтай жиілеп, мыңдаған адамның қаза болуына себеп болды. Қарулы топтар шалғай елді мекендердегі мектептер мен бейбіт тұрғындарға шабуыл жасап, олардан ақша бопсалайды. Әдетте олар қалың орманды аумақтарда жасырынып жүреді. Биліктің арнайы операцияларына қарамастан, жоғалып кеткен балалардың көбі әлі күнге дейін табылмаған. Осыған байланысты қауіпсіздік шаралары күшейтіліп, мектептер жабылды. Құқық қорғау органдары қылмыскерлердің орналасқан жерін анықтауға күш салып жатыр.

Мохаммед Умару Бако, Нигер штатының губернаторы:

- Қазір кінәлі тарапты анықтаудан бұрын, ең әуелі балалардың қауіпсіздігін қамтамасыз етуіміз керек. Сол себепті бүкіл құқық қорғау органдары мен жергілікті қауымдастықтарды күшті тек іздеу және құтқару шараларына бағыттауға шақырамыз.

Шабуылдан аман қалғандардың бірі 13 жастағы Стивен Самюэл. Түн ішінде содырлар оқушыларды күштеп орманға айдап бара жатқанда, ол қолайлы сәтті пайдаланып, қашып құтылған.

Стивен Самюэл, оқушы:

- Олар байқамай тұрғанда қашып үлгердім. Әрине басында қорыққаным рас. Себебі қайда баратынымды білмедім. Тек тіке жол бойымен жүре бердім. Абырой болғанда, жолда көрші ауылдан бір танысымды кездестіріп қалдым. Ол мені үйге дейін жеткізіп тастады. 

Ал бұған дейін, жаппай ұрланған 300-ден астам оқушының шамамен елуі қашып шыққан болуы мүмкін деген ақпарат тараған еді. Алайда бұл деректі ата-аналар да, мектеп әкімшілігі де растай алмай отыр. Олардың айтуынша, бүгінге дейін мектепке бірде-бір бала жеткізілмеген.

Эммануэль Бала, тұрғын:

- Шынымды айтсам, мектепке қайтарылған бірде-бір баланы өз көзіммен көрмедім. Олардың нақты табылғаны әлі расталған жоқ. Сондықтан ақпараттың рас өтірігіне кім кепіл?

2014 жылы «Боко Харам» ұйымы 276 мектеп оқушысын ұрлағаннан кейін, халықаралық қауымдастық Нигериядағы қауіпсіздік мәселесіне ерекше назар аудара бастады. Сол оқиғадан бері жылдар өтсе де оқушылардың 82-сі әлі күнге дейін табылған жоқ. Сол себептен қазіргі жағдай тұрғындардың үрейін күшейтіп отыр.

Динара Орынтай