Ақмола облысында жоғалған 7 баланың әкесі әлі табылмады туыстары не дейді

АСТАНА, 14 қаңтар – Sputnik. Ақмола облысы Біржан сал ауданы Кеңащы ауылында үш ай бұрын жоғалған Айжалғас Қайруллин әлі күнге табылған жоқ. Баласынан айырылған отбасы тергеу дұрыс жүрмей жатыр дейді. Sputnik Қазақстан тілшісі жоғалған жігіттің туыстарынан мән-жайды сұрап білді.

Үйден көршісі шақырып әкеткен

21 қазан... Қайруллиндер отбасы үшін оқыс оқиға болған күн. Ай-күннің аманында орда бұзар 31 жастағы 7 баланың әкесі Айжалғас Қайруллин ауылдан із-түссіз жоғалып кетті. Ол үйден көршісімен шығып кетіп, қайтып оралмаған.

"21 қазан күні кешке көрші Азамат үйден шақырып әкеткен. Ауылда жалғыз ғана дүкен бар, сол дүкеннен екеуі саудасын жасаған. Сөйтіп екеуі мал бағатын қосқа кеткен. Сол күйі Айжалғас жоқ, көршім Азаматтыкінен барып сұрадым. Азаматтың анасы оның мас боп жатқанын айтты. Сол күні кешке тағы барып сұрадым. Азамат маған Айжалғас қоста қалды, мен сенің балаңды неге тауып беруім керек деді. Сол күйі Айжалғас жоқ болды, табылмады", - дейді жоғалған жігіттің анасы Бақшагүл Даирова.

"Көршімнен күдіктенуге дәтім бармады"

Көрші Азаматтың 19 жастағы ұлы Айжалғасты сол күні түнгі сағат 12-лер шамасында көргенін айтқан. Бірақ полицияға оны мойындамаған.

"Үйге келіп тұрып айтты. "Түнде Көкшетаудан машина алып келгенде Айжалғасты көрдім, ол әкемді сұрады. Үйіңе бар, әкем мас боп отыр деп айттым" деді. Бірақ полиция сұрағанда "мен түсімде көріппін" деп мойындамады. Негізі көршім Азамат анда-санда ұрттағаны болмаса, жақсы адам. Үнемі көмек қолын созып тұрады. Жасы 45-те, осы ауылда туып өскен. Жаман әдетін көрген емеспін", - дейді анасы.

Ақмола облысы Біржан сал ауданы Кеңащы ауылында үш ай бұрын жоғалған Айжалғас Қайруллин әлі күнге табылған жоқ

Ақмола облысы Біржан сал ауданы Кеңащы ауылында үш ай бұрын жоғалған Айжалғас Қайруллин әлі күнге табылған жоқ

Көршіден күдіктенуге дәтім бармады деген Бақшагүл полицияға 3-4 күн өткен соң ғана шағымданған. Бір шеті баласы аман-есен оралады деп күткен.

Полиция менің шағымыммен іс қозғамады

Азамат Айжалғаспен қосқа бара жатып, жолдан Айжалғастың көліктен түсіп қалып, ауылға қайтып кеткенін айтқан. Дәл сол күні ауылдың бір тұрғыны сол қосқа барады. Бірақ ол жерден Азамат пен бөтен малшының ішімдік ішіп отырғанын көрген, бірақ Айжалғасты көрмеген.

"Азаматтың айтуынша, Айжалғас екеуі қосқа жетпеген. Сағат кешкі 19:30-21:30 арасында небәрі екі сағатта балам жоғалып кетіп отыр. Азамат қоста қалды дейді, біресе жолда түсіп қалды дейді, ал оның баласы түнгі 12 шамасында есік алдынан көрдім дейді. Алдында бір шулатып іздеп ем, тергеу жүргендей сияқты болды, бірақ менің арызыммен ешкім де қамалмады. Азаматты полиция ішімдік ішіп көлік басқарғаны үшін ғана екі рет қамады. Қазір үйінде жүр", - дейді Айжалғастың анасы.

Неменге келдің, балаңды өлтіріп тастады

31 жастағы Айжалғас ешкіммен қақ-соғы жоқ, тыныш адам. Ілік іздеп кісімен жаға жыртысқан жері жоқ, әлжуаздау, дейді туыстары.

"Арасында өзім де құмалақ саламын. Балам құйысқанға оралып үйге кіріп тұрған жоқ, айдалада деп көрсетеді. Не өлі, не тірі екенін білмеймін. Атақты деген бір көріпкелге де бардым. "Неменеге келдің, балаңды сол күні өлтіріп тастаған. Өлтірем деп өлтірмеді, абайсызда болған. Сенің балаңмен қосқанда ол жерде төрт адам болған. Біреуі жас адам. Сол жас адам айтуы керек еді, неге айтпай отырғаны белгісіз" деді көріпкел. Көршімнен де күіктенгім кеп тұрған жоқ, бірақ маңдайыма біткен жалғыз балам. Тірі болса, біреу алып кетсе, қайтарыңыздаршы", - дейді Бақшагүл.

Баламды қайтарса, сұрағанын берем деген ана еңірегенде етегі жасқа толып отыр.

Полиция күдіктіден айғақ таппапты

Айжалғас Азаматтың көлігінен түсіп ауылға барарда адасып кетті деуге келмейді. Өйткені ауыл шамы самаладай жанып тұр, түнде де адасу мүмкін емес, дейді Айжалғастың туысы Болатбек Даиров.

"Ауыл жазық жерде орналасқан, орман да жоқ. Айжалғасты іздеп барлық жерді қарадық. Үлкен көл де жоқ маңымызда. Ұсақ көлшік сияқты бар, оның барлығы тексерілді. Еш жерде жоқ. Істі сұрап аудандық полиция бөліміне бардық. Тергедік, күдікті деген ер адам ешнәрсе айтпайды, арнайы детектордан да өткіздік дейді, бірақ біз ешнәрсесін білмейміз.

Ақмола облысы Біржан сал ауданы Кеңащы ауылында үш ай бұрын жоғалған Айжалғас Қайруллин әлі күнге табылған жоқ

Ақмола облысы Біржан сал ауданы Кеңащы ауылында үш ай бұрын жоғалған Айжалғас Қайруллин әлі күнге табылған жоқ

Игорь Валерьевич деген аудандық полиция бөлімінің басшысымен сөйлесіп тұрамыз, "іздеу жүріп жатыр, бізде күдіктіде күмән тудыратын айғақ боп тұрған жоқ, сол себепті тек іздеу жұмыстарын жүргізіп жатырмыз" деді", - дейді Болатбек Даиров.

Айжалғастың артында 7 баласы қалды: үлкені 4-сыныпта оқыса, кенжесі небәрі бір жаста. Жоғалардан бір ай бұрын думандатып баласының бесік тойын жасаған. Жанжал болып, біреумен сөзге келіспей қалғаны туралы оқиғадан бұрын айтпаған. Бұған дейін Айжалғастың үйінен кетіп қалатын әдеті де болмаған. Тұрмысы жақсы, түтіні түзу шыққан отбасы әлі күнге жалғыз ұлының не өлі, не тірі екенін білмей дал.

Тергеудің қалай жүріп жатқанын Sputnik Қазақстан тілшісі Ақмола облыстық полиция департаментінен сұрап көрді.

"Содан бері оның орналасқан жері белгісіз болып қалуда және іздеулер шамамен 2,5 ай бойы жалғасып жатыр. Іздеу іс-шаралары барысында пилотсыз ұшу аппараттарын, қызметтік-іздестіру иттерін және жүріп өту мүмкіндігі жоғары автокөліктерді пайдалана отырып, дала аумағына ауқымды барлау жүргізілді. Полицейлер Кеңащы, Ақбұлақ, Заозерное, Қазанқап ауылдарының аумақтарын, жақын маңдағы шалғай учаскелерді, орман алқаптарын және жергілікті жердің жету қиын учаскелерін зерттеді", - дейді полицияда.

Іздестірумен қатар жедел-тергеу іс-шаралары да жүргізілді. Жедел қызметкерлер Айжалғас Қайруллиновтың жоғалып кеткен күні оны көрген азаматтарды, сондай-ақ жақын қарым-қатынас шеңберіндегі адамдарды анықтады және жауап алды.

"Қазіргі уақытта іздеу шаралары жалғасып жатыр. Айжалғас Қайруллиннің белгілерімен бағдарлар басқа облыстардың полиция департаменттеріне жіберілді, сондай-ақ еріктілердің көмегімен әлеуметтік желілер арқылы таратылды. Құқық қорғау органдары азаматтардан іздеуде көмек көрсетуді және жоғалған адамның орналасқан жерін анықтауға көмектесетін кез келген ақпаратты хабарлауды сұрайды", - дейді Ақмола облыстық полиция департаментінде.