​Нормадан жылы: синоптиктер Қазақстандағы қысқы ауа райы болжамын ұсынды

ЖИ көмегімен жасалған сурет

«Қазгидромет» ұлттық гидрометеорологиялық қызметі алдағы суық жартыжылдыққа арналған консультативтік маусымдық ауа райы болжамын жариялады. Мамандардың мәліметінше, елдің басым бөлігінде қыста температура климаттық нормадан жоғары болады деп күтілуде.

Желтоқсан: бүкіл территорияда жылы болады

Қыстың алғашқы айы қазақстандықтарды жайлы ауа райымен қуантады. Желтоқсанда ауаның орташа температурасы республиканың бүкіл аумағында нормадан 2 градусқа жоғары болады деп болжануда.

Қай жерде қар көп жауады: солтүстікте, солтүстік-батыста және солтүстік-шығыста (СҚО-да, Павлодар облысының басым бөлігінде, Қостанай, Ақмола, БҚО, Ақтөбе облыстарының солтүстігінде, сондай-ақ Абай және ШҚО облыстарында). Жауын-шашын аз болады: Қызылорда облысының оңтүстігінде. Қалған өңірлерде жауын-шашын мөлшері көпжылдық норма шамасында болады деп күтілуде. Қаңтар: солтүстік-батыста аяз, қалған өңірлерде жылы 

Қыстың ортасында ауаның орташа температурасы елдің басым бөлігінде нормадан 1–2 градусқа жоғары болады. Температуралық көрсеткіштер норма шегінде солтүстік-батыс бөлікте сақталады (БҚО, Атырау, Ақтөбе, Қостанай, СҚО облыстарының басым бөлігінде және Ақмола облысының солтүстік-батысында).

Нормадан жоғары қар жауу: БҚО-ның оңтүстік-батысында, Атырау облысының батысында және Маңғыстау облысында. Жауын-шашын тапшылығы: Қызылорда облысының оңтүстік-шығыс бөлігінде, Ұлытау, Қарағанды облыстарының және Абай облысының оңтүстігінде, сондай-ақ Түркістан, Жамбыл, Алматы облыстары мен Жетісу облысының солтүстігінде. Ақпан: бүкіл ел бойынша қар мол жауады

Қыстың соңы салыстырмалы түрде жылы болады деп күтілуде — ауаның орташа температурасы Қазақстанның басым бөлігінде нормадан 1–3 градусқа жоғары болады. Климаттық норма шегіндегі ауа райы тек солтүстік пен шығыста сақталады (СҚО, ШҚО, Павлодар, Ақмола және Қостанай облыстары).

Нормадан көп жауын-шашын республика аумағының басым бөлігінде күтіледі. Норма шамасында: батыс өңірлерде (БҚО, Атырау, Түркістан, Ақтөбе, Маңғыстау және Қызылорда облыстары). Нормадан аз: Маңғыстау облысының оңтүстік-шығысында, Ақтөбе облысының оңтүстігінде және Қызылорда облысының оңтүстік-батысында.

Бүгін, 12:27