“Бұдан да әжетхана болғаны жақсы еді“ Өскемен тұрғындары әкімдіктің бастамасын бағаламады

Өскеменде афишалар мен ресми хабарландыруларға арналған жаңа шағын сәулет нысандары (ШСН) орнатылды. Алайда бұл нысандар қала тұрғындарының қызығушылығын емес, таңданысы мен әзілін тудырды. Жұртшылық бұл конструкцияларды душ кабиналарына ұқсатып, олардың неліктен аялдамалар мен алаң ортасына қойылғанына түсінбей отыр, деп хабарлайды Tengrinews.kz тілшісі.

Өскеменнің бірнеше ауданында жаңа шағын сәулет нысандары пайда болды. Олар конус тәрізді шатыры бар шыны цилиндрге ұқсайды.

Instagram-дағы бұл жарияланымды көру

Өскемен, ШҚО, Қазақстан (@1720.yk) жариялаған пост

Әлеуметтік желі қолданушылары бұл нысандардың не екенін және неге "аяқ астына" қойылғанын айтып, жарыса пікір жазды. Мәселен, осындай ШСН-нің бірі қоғамдық көлік аялдамасында тұрып, жол көрінісіне кедергі келтірсе, екіншісі барлық бұқаралық іс-шаралар өтетін орталық алаңның қақ ортасында орналасқан.

Желді күндері бұл конструкциялардың есіктері ашылып кетіп, өтіп бара жатқан адамдар үшін күтпеген қауіп төндіретіні белгілі болды.

Фото Tengrinews.kz

Өскемен тұрғындары мұндай талғамсыз дүниені орнатуға кім рұқсат бергенін сұрап, бұл душ кабиналарына ұқсайтынын жазды. Кейбіреулер тіпті: "Бұдан да қоғамдық әжетхана болғаны жақсы еді", - деп пікір білдірген.

Ал қалада дәретхана мәселесі шынымен де өзекті. Бұған дейін қала әкімі Алмат Ақышов журналистердің сұрақтарына жауап бере отырып, бұл мәселені кәсіпкерлердің көмегімен шешу жоспарланып отырғанын айтқан болатын. Оның сөзінше, бұл іспен мемлекет емес, бизнес айналысқаны маңызды, өйткені қалада бюджет есебінен салынған дәретханалардың тиісті деңгейде күтілмегеніне қатысты мысалдар бар.

Ал ШСН-ге қатысты Өскемен әкімінің баспасөз қызметі бұл нысандар қалалық іс-шаралардың афишалары мен әкімдіктің ресми хабарландыруларын орналастыруға арналғанын хабарлады.

"Оларды орнату тұрғындарды алдағы мәдени, спорттық және қоғамдық шаралардан хабардар ету үшін қажет. Жеке хабарландырулар ілуге арналмаған", - деп атап өтті қалалық әкімдіктегілер.

Фото Tengrinews.kz

Десе де, әзірге бұл тұмбаларда ешқандай хабарландыру көрінбейді. ШСН-нің құны туралы сауалға қала әкімдігінің баспасөз қызметі жауап бермеді.

Бізді Google-дың негізгі дереккөздер тізіміне қосыңыз