Норвегия кронханшайымының ұлы зорлау қылмысы үшін 4 жылға түрмеге кесілді

Осло округтік соты Норвегияның кронханшайымы Метте-Мариттің үлкен ұлы Мариус Борг Хёйбиге қатысты үкім шығарды. Корольдік отбасының мүшесі 4 жылға бас бостандығынан айырылды, деп хабарлайды Tengrinews.kz тілшісі 730.no сайтына сілтеме жасап.

Осло округтік соты Норвегияның кронханшайымы Метте-Мариттің үлкен ұлы Мариус Борг Хёйбиге қатысты үкім шығарды. Корольдік отбасының мүшесі 4 жылға бас бостандығынан айырылды, деп хабарлайды Tengrinews.kz тілшісі 730.no сайтына сілтеме жасап.

Сот 29 жастағы Хёйбиді зорлауға қатысты айыптың екі тармағы бойынша, сондай-ақ ұрып-соғу және тұрмыстық зорлық-зомбылықты қоса алғанда, ілеспе бірқатар қылмыс жасағаны үшін кінәлі деп тапты. Атышулы тергеу амалдары 2024 жылдың жазында қызға жасалған бір шабуыл дерегінен басталып, екі жылдың ішінде қырыққа жуық қылмыстық эпизодпен толықты.

Сотталушы өзіне тағылған жыныстық зорлық-зомбылық фактілерін үзілді-кесілді жоққа шығарды. Соған қарамастан, ол тергеу барысында есірткі әсерінен бұрынғы серіктестерінің біріне күш көрсеткенін растап, басқа құқықбұзушылықтар бойынша кінәсін ішінара мойындады.

Мариус Борг Хёйби монархтар отбасының мүшесі атануы 2001 жылы анасы Метте-Мариттің кронханзада Хоконмен тұрмыс құруымен байланысты. Дегенмен оның ресми лауазымы мен таққа мұрагерлік ету құқығы жоқ.

Сот үкімі әлі заңды күшіне енбеді - қорғаушы тарап та, айыпталушыны 7 жылдан астам уақытқа бас бостандығынан айыруды сұраған прокуратура да бұл шешімге шағым түсіруге құқылы.

Бұған дейін Хёйби отбасының айналасында тағы бір дау туындаған болатын: АҚШ-та жарияланған құжаттар оның анасы, кронханшайым Метте-Марит 2011-2014 жылдар аралығында жыныстық қылмыстары үшін сотталған Джеффри Эпштейнмен тығыз байланыста болғанын көрсетті.

Метте-Марит Эпштейнмен араласуын "масқара" деп атап, кешірім сұрады. Сарай әкімшілігі 2013 жылы оның төрт күн бойы Эпштейннің Палм-Бичтегі резиденциясында тұрғанын және онымен бірнеше рет кездескенін растады, алайда ол оның жеке аралына ешқашан бармаған.

Еске сала кетейік, ақпанда полиция Хёйбиді зорлау айыбы бойынша сотқа баруына екі күн қалғанда әйелге шабуыл жаса, пышақпен қоқан-лоқы көрсетті және соттың тыйым салу бұйрығын бұзды деген айыппен ұстаған болатын.