Клиенттерге жалған төлемдер рәсімдеген шебер сотталды: 8 жылға түрмеге

Петропавлда кәсіпорынның қабылдаушы шебері бір жарым жыл бойы клиенттерге ақшаны қайтару туралы жалған құжаттар рәсімдеп, кассадан миллиондаған теңге ұрлаған. Кассациялық сот қоғам назарын аударған қылмыстық іске нүкте қойды.

Сот анықтағандай, 2023 жылғы мамырдан 2024 жылғы қыркүйекке дейін кәсіпорын қызметкері заңсыз пайда табудың схемасын ойластырған. Ол «1С» бухгалтерлік бағдарламасында клиенттерге тапсырыстарының күші жойылғаны немесе бұрын орындалғаны үшін ақшаны қайтару туралы жалған операцияларды рәсімдеген. Олардың арасында бірнеше жыл бұрын орындалған тапсырыстар да болған.

Алайда шын мәнінде клиенттер ақшаны қайтаруды сұрамаған және ешқандай қаражат алмаған. Шебер кассадағы қолма-қол ақшаны өзіне алып отырған.

Осылайша алаяқ 17,9 миллион теңгені жымқырған.

Бірінші сатыдағы сот ер адамды сеніп тапсырылған бөтен мүлікті аса ірі мөлшерде иемденіп алу қылмысы бойынша кінәлі деп таныды (Қылмыстық кодекстің 189-бабының 4-бөлігі). Сот оны 8 жылға бас бостандығынан айыруға және осындай мерзімге материалдық жауапты лауазымдарды атқару құқығынан айыруға үкім шығарды. Сондай-ақ одан келтірілген залалдың толық сомасы өндірілді.

Сотталған азамат өзінің кінәсіз екенін және кассаға қол жеткізу мүмкіндігі болмағанын айтып, үкімге Жоғарғы Сотта шағымдануға тырысты. Алайда кассациялық алқа оның шағымын қанағаттандырмады.

«Оның кінәсі куәгерлер мен клиенттердің айғақтарымен, “1С” бағдарламасының деректерімен, сараптама қорытындыларымен және күдіктінің ұрлық жасау тәсілін егжей-тегжейлі баяндаған бейнежазбамен дәлелденді. Клиенттер тапсырыстардың күшін жою туралы өтініш бермегендерін растады. Жазаны жеңілдетуге негіз жоқ», — деп хабарлады қылмыстық істер жөніндегі кассациялық сот.

Үкім заңды күшіне енді. 8 жылға бас бостандығынан айыру жазасы өзгеріссіз қалдырылды.

Бүгін, 11:05