Нұрай Серікбай ісі: прокурор сотта жантүршігерлік айыптарды жариялады

Шымкентте 21 жастағы Нұрай Серікбайдың өліміне қатысты қоғамда үлкен резонанс тудырған қылмыстық іс бойынша алдын ала сот тыңдауы өтті, – деп хабарлайды Aikyn.kz сайты. 

Сот барысында прокурор айыптау актісін оқып, айыпталушы Шерхан Аймаханға тағылған айыптардың мән-жайын жариялады.

Мемлекеттік айыптаушының мәліметінше, айыпталушы Нұрайды ұзақ уақыт бойы қудалап, кездесуге мәжбүрлеуге әрекеттенген. Тергеу деректеріне сәйкес, кей кездері ол екі сағаттың ішінде қызға 76 рет қоңырау шалған. Бұған дейін Нұрай телефон нөмірін екі мәрте ауыстыруға мәжбүр болғанымен, қудалау тоқтамаған.

Прокурордың айтуынша, қайғылы оқиға болған күні Нұрай бірге саябаққа барудан бас тартқан. Осыдан кейін айыпталушы өзімен бірге алып келген пышақпен оған бірнеше рет соққы жасап, кейін оқиға орнынан кетуге әрекеттенген. Алайда араға аз уақыт салып қайта оралып, куәгердің көз алдында Нұрайға тағы бірнеше рет пышақ сұққан. Тергеу нұсқасы бойынша, жәбірленушінің денесінде жалпы 35 пышақ жарақаты анықталған. Ол алған ауыр жарақаттары мен көп қан жоғалтудың салдарынан оқиға орнында көз жұмған.

Шерхан Аймаханға Қылмыстық кодекстің «Аса қатыгездікпен жасалған адам өлтіру», «Сталкинг» және «Некеге тұруға мәжбүрлеу» баптары бойынша айып тағылған. Бірақ сотталушы өзіне тағылған айыптарды мойындамайтынын мәлімдеді.

Сот барысында айыпталушы журналистердің қатысуына, сондай-ақ процесті тікелей эфирде көрсетуге қарсы екенін айтты. Сонымен бірге істі алқабилердің қатысуынсыз қарауды сұрады.

Кеңесу бөлмесінен шыққан судья негізгі сот талқылауын 28 шілдеге белгілеп, сот отырысы ашық өтетінін хабарлады. Дегенмен тараптардың ұстанымдары қарама-қайшы болғандықтан, процесті тікелей эфирде көрсетуге рұқсат берілмеді. Бұқаралық ақпарат құралдары өкілдеріне заң талаптарына сай сот отырысына қатысып, фото және бейнетүсірілім жүргізуге мүмкіндік беріледі.