Нұрай Серікбай ісі: күдіктінің туыстары да тексеріліп жатыр

Шымкентте Нұрай Серікбайдың өліміне қатысты қылмыстық іс бойынша тергеу жалғасып жатыр, – деп хабарлайды Aikyn.kz сайты.

Құқық қорғау органдары жәбірленуші тараптың «бойжеткен күдіктінің үйінде туыстарының бақылауында болған» деген уәжін тексеріп жатыр.

Ішкі істер министрінің орынбасары Санжар Әділовтің айтуынша, тергеу барысында іске қатысы болуы мүмкін барлық тұлғаның әрекетіне құқықтық баға беріледі.

«Жәбірленуші тарап бірқатар уәж келтіріп отыр. Атап айтқанда, Нұрайды күдіктінің үйіне жеткізу кезінде жанында болған адамдардың да қатыстылығын анықтау қажет. Тергеу аясында барлық мән-жай толық тексеріледі», – деді Әділов Мәжіліс кулуарында.

Оның сөзінше, осы оқиғаға қатысы болуы мүмкін азаматтың барлығынан жауап алынып жатыр.