Орал қаласында жұмысшы станокқа қысылып қаза тапты

Қайғылы оқиға Орал қаласындағы ЖШС-ның біріне қарасты шұжық цехының аумағында болған, – деп хабарлайды Aikyn.kz сайты.

40 жастағы жұмысшыны өндірістік станок қысып қалған. Алған ауыр жарақаттарынан ер адам оқиға орнында көз жұмды.

Аталған деректі Батыс Қазақстан облысы бойынша Мемлекеттік еңбек инспекциясы комитеті департаменті растады.

– Оқиға бойынша тексеру жүргізіліп жатыр, барлық мән-жайы анықталады, – деп хабарлады ведомствода.

Ал БҚО полиция департаментінің баспасөз қызметі ер адамның өліміне қатысты қылмыстық іс қозғалып, сотқа дейінгі тергеу басталғанын мәлімдеді.