Оралда жалған қорытынды шығарған сот медицина сарапшысы сотталды

Орал қаласында сот-медициналық сарапшы Марат Жонысовқа қатысты үкім шықты. Ол қаза тапқан қорықшының денесін зерттеу кезінде қорытындыны қасақана бұрмалағаны үшін кінәлі деп танылды.

Бастапқыда сарапшыға төрт жылға шартты түрде бас бостандығын шектеу жазасы тағайындалған. Алайда, амнистия туралы заңды ескере отырып, жаза мерзімі 3 жыл 2 айға дейін қысқартылды, деп хабарлайды Astanatv.

Сонымен қатар, сот Жонысовты жәбірленуші Алексей Победимовке 3 миллион теңге моральдық өтемақы және 304 мың теңге материалдық шығын төлеуге міндеттеді. 

Соттың мәліметінше, бұрмаланған қорытындының кесірінен қорықшы өлімінің нақты себептерін және кінәлі болуы мүмкін тұлғаларды анықтау үшін қажетті уақыт жоғалған.

Марқұмның әкесі Алексей Победимов сот шешімімен келіспейді. Ол жазаны тым жеңіл деп санап, сарапшының нақты түрме мерзімін алуын талап етуде.

«Басқа сарапшыларға сабақ болуы үшін оны түрмеге отырғызу керек еді. Мен оның сотталып, түрмеге жабылуын сұраймын», — деді ол.

Победимовтің айтуынша, бастапқы қорытынды жалған болған және онда айтарлықтай алшақтықтар болған.

«Ол тіпті қорытындысында менің ұлыма тиесілі емес ішкі ағзаларды сипаттаған. Егер мен ұлымның денесін эксгумация жасатпағанда, бұл оқиғаның немен аяқталары белгісіз еді», — деді марқұмның әкесі.

Қорықшының денесі 2023 жылдың тамызында табылған. Жонысов жүргізген алғашқы сараптама денеден ешқандай жарақат таппай, мәйіттің күйін шіру процестерімен байланыстырған. Алайда, марқұмның ата-анасы жергілікті мамандардың қорытындысымен келіспей, қайта тергеу жүргізуге қол жеткізді. Ол үшін денені қайта қазып алу (эксгумация) қажет болды.

Елордалық мамандар жүргізген қайта сараптама нәтижесінде көптеген жарақат анықталды. Олардың қатарында: іштегі гематомалар, 10 сынған қабырға, тіл асты сүйегінің сынуы, саусақтың сынуы, иектің жарақаты және арқадағы терең зақымдар. Бұл деректердің ешқайсысы алғашқы қорытындыда көрсетілмеген.

Сондай-ақ, марқұмның сол жақ бүйрегінің жоғалып кетуі бөлек мәселе ретінде қаралды. Іс материалдарына сәйкес, елордалық сарапшылар қайта зерттеу кезінде бұл мүшені таппаған.

Сотта Марат Жонысов өз ұстанымын жұмыстың ауыр жағдайларымен түсіндірді. Оның айтуынша, мәйітханада ыстықтан тоңазытқыштар істемеген, ал мәйіт бөлме температурасында бір тәулік бойы жатқан.

«Дене шіру белгілерімен түсті. Ми немесе өкпедегі өзгерістерді көрген жоқпын. Қабырғалар ығысумен сынған кезде плевра міндетті түрде жыртылады, бұл көзге көрініп тұрады. Ондай ештеңе болған жоқ», — деді сарапшы.

Сондай-ақ ол елордалық мамандардың қосымша тілік жасағанын, ал өзінің оны жасауға міндетті болмағанын алға тартты. Беттегі сырылған ізді дененің күйіне байланысты байқамағанын айтты. Жоғалған бүйрек туралы сұраққа Жонысов: «Демек, нашар іздеген. Ол эксгумация кезінде кеуіп кетуі немесе конгломератқа айналуы мүмкін еді», — деп жауап берді.

«Уральская неделя» басылымының мәліметінше, бұл жерде әңгіме 32 жастағы қорықшы Эдуард Победимов туралы болып отыр. Оның сүйегі 2023 жылғы 6 тамызда таңертең Дөңгелек су қоймасынан табылған. Оқиғадан бір күн бұрын ол әйеліне және кордондағы досына катерінің моторы бұзылып қалғанын, көмек күтіп отырғанын айтқан. Кейінірек оған көмекке кеткен құтқарушы Эдуардтың жоқ екенін, тек оның катерін тапқанын хабарлаған.

Әкесі Алексей Победимов басынан-ақ ұлының кездейсоқ көз жұмғанына сенбеген. Ол жерлеу рәсімінен кейін ұлының катеріндегі зақымдарды, алдыңғы әйнектің жоқтығын, соққы іздері мен қисайған бекітпелерді көргенін айтады. Сондай-ақ, марқұмның күртесінен шыны сынықтары табылған. Жақындары бұл детальдар соқтығыс болғанын көрсетуі мүмкін деп есептейді, бірақ алғашқы сараптама елордалық мамандар кейін анықтаған жарақаттардың ешбірін тіркемеген.

Бүгін, 09:52