Оралдық оқушылар Қытайға барады

2025 жылғы 12-14 қазанда Алматы қаласында өткен «Aspan Fest – 2025» халықаралық дрондар жарысында оралдық жас техниктер керемет нәтижеге қол жеткізді. Батыс Қазақстан облысы атынан қатысқан облыстық балалар техникалық шығармашылығы орталығының оқушылары жоғары жүлдеге ие болып, Қытайда өтетін әлемдік додаға жолдама ұтып алды, деп хабарлайды Egemen.kz.

«Aspan Fest – 2025» халықаралық дрондар жарысы елімізде биыл үшінші мәрте өтіп жатыр. Осындай алғашқы жарыс 2023 жылы Орал қаласында ұйымдастырылған болатын. Қазір еліміздің барлық өңіріне тарап, мектеп бағдарламаларына да енгізіле бастаған FPV дрондар сайысы халықаралық деңгейге шықты деуге болады. Өйткені осы соңғы жарысқа қатысуға 10 мемлекеттен команда ниет білдіріп, 80-ге жуық пилот қатысқан екен.

«Жарыс өте тартысты өтті. Былтырғымен салыстырғанда сайысқа қатысушылар саны да өсті, ал дрон ұшыру сапасы өте жоғары деңгейде болды», дейді батысқазақстандық команда жетекшісі Айбек Мирғалиев. Айта кетейік, Айбек Исламғалиұлы – облыстық балалар техникалық шығармашылығы орталығының қосымша білім беру педагогы, «Авиаүлгілеу» үйірмесінің жетекшісі.

Алматыда оқушылар микродрондар категориясы бойынша да, үлкен дрондар бойынша да сынға түскен. Әсіресе жылдамдығы 100-200 км/сағат жылдамдықпен ұшып, кедергілер арасынан өтетін бесдюймдік дрондар сайысы өте тартысты болған екен. Жарыстар әлемдік MultiGP үлкен лигалар ережесімен өткен. Елімізде тұңғыш рет ұйымдастырылған авиамоделдеу жарысында командалар кәдімгі әуе ұрысына қатысыпты.

«Біздің команда «Футбол дрон» сайысында бірінші орынды жеңіп алды. Микродрон жарысында Орал қаласындағы №28 мектеп-лицейде оқитын шәкіртіміз Әлихан Нысанбаев бірінші орынға шықты. Осы Әлихан Бәйтерек ауданы Байқоныс ауылындағы Қадыр Мырза Әлі атындағы мектеп оқушысы Меңдібек Темірхановпен бірге «Әуе ұрысына» қатысып, екінші орынға ие болды. Бесдюймдік дрон жарысында да Әлихан Нысанбаев екінші орынға тұрақтады. Осындай нәтижелеріміздің арқасында әлемдегі ең мықты чемпионатқа – Шанхай қаласында өтетін дүниежүзілік әуе спорты федерациясы (FAI) ұйымдастырған халықаралық жарысқа жолдама алдық», дейді Айбек Исламғалиұлы.

FPV дрон, авиамоделдеу – бүгінде әлем назарын ерекше аударып отырған саланың бірі. Әсіресе бұл салаға жас жеткіншектерді қызықтыру, оқушыларды тартудың келешегі зор. Қазір Батыс Қазақстан облысында жүздеген бала осы саладағы үйірмелерге қатысып жүр. Соның ішінде қаладан тыс ауыл-аудандарда да осы саланы дамытып, балаларды техникалық мамандықтарға тартып жүрген бастамашыл ұстаздар көбейіп келеді.