Орман өртін ерте анықтау жүйесіне ЖИ технологиялары енгізіліп жатыр

Жобаны жүзеге асыру барысы және өртті ерте анықтау жүйесінің ауқымы туралы экология және табиғи ресурстар вице-министрі Нұрлан Құрмалаев хабарлады.

Оның айтуынша, «Семей орманы» мемлекеттік табиғи резерватында 37 кешеннен тұратын желі құрылған. Олардың әрқайсысы антенна-діңгектен, мультиспектрлі камерадан, бейнекадрларды таратуға арналған радиорелелік модульден және дербес энергия блогынан тұрады. Жүйе жасанды интеллектімен біріктірілген, ол нақты уақыт режимінде түтінді анықтап, сигналды жедел басқару орталығына жібереді.

— Жүйенің негізгі мәні — жедел әрекет етіп, өрт ошақтарын оқшаулау және жою үшін орман өрттерін ерте анықтау. Бұл тәжірибе бүгінде Президент тапсырмасына орай кең ауқымда таратылуда. Ол бойынша бірінші кезең аяқталды, онда Ақмола облысының бес орман шаруашылығы, Науырзым қорығы және Астана қаласының маңында орналасқан жасыл аймақ қамтылған. Екінші кезең Іле-Алатау, Көлсай көлдері, Сайрам-Өгем, Баянауыл, Қарқара және Бурабай таулы жерлерінде жүзеге аспақ. Үшінші кезең — Шығыс Қазақстан облысындағы 10 орман шаруашылығы мен ұлттық парк, — деп атап өтті Нұрлан Құрмалаев.

Қазақстанның авиацияны қолдана отырып, орман өртін анықтау және сөндіру саласындағы бірегей тәжірибесі әлемнің дамыған елдері стандарттарына сәйкес келеді. Қызметтің техникалық әлеуеті мен кадрлық қамтамасыз етілуі туралы «Қазавиаорманқорғау» РМҚК бас директорының орынбасары Игорь Абоев мәлімдеді.

Оның айтуынша, бүгінде кәсіпорын штатында 302 қызметкер бар. Ұжымның негізгі бөлігін десантшы-өрт сөндірушілер, қолжетімділігі қиын орман алқаптарына қону әдісін қолдана отырып, өрт ошақтарын тікелей сөндіру жұмыстарын жүргізетін жоғары білікті мамандар құрайды.

— Біздің «Қазавиаорманқорғау» — әлемнің барлық елінде кездесе бермейтін бірегей кәсіорын. Мұндай құрылым АҚШ, Канада, Оңтүстік Корея, Түркия, Ресей сияқты дамыған елдерде және Қазақстанда ғана бар. Кәсіпорын авиацияны қолдана отырып, орман өрттерін анықтау және сөндірумен айналысады, — деп атап өтті Игорь Абоев.

Айта кетелік Бектенов Абай облысындағы «Семей орманы» резерватында өртке қарсы цифрлық жүйені тексерген еді.