Орталық Азия елдері табиғи апаттар қаупін сейілту жүйесін нығайтуға уағдаласты

— Бүгінгі кездесу Халықаралық зілзала құрбандарын еске алу күні аясында ұйымдастырылып отыр, тиісінше ол табиғи апаттардың ауыр зардабын әлемдік қауымдастықтың есіне салады. Бұл — мемлекеттердің өзара іс-қимылдарды біріктіру қажеттілігін көрсетеді. Бүгін біз «Орталық Азиядағы апаттар қаупін сейілту жүйесін нығайту» бастамасын іске асырғалы отырмыз. Біз оны ресми сипатқа ие механизм ғана емес, сондай-ақ қауіпсіздік саласындағы өзара ынтымақтастықтың жаңа моделін қалыптастыратын құрал ретінде қарастырамыз, — деді министр.

Фото: Әлихан Асқар/Kazinform

Ол атап өткендей, өңірдегі климаттық өзгеріс, жер сілкінісі, су тапшылығы және техногендік апаттар тиімді үйлестірілген іс-қимылдарды талап етеді.

— Қазақстан халықаралық ынтымақтастықты нығайту, орнықты даму қағидаттарын ілгерілету және төтенше жағдайларда ұжымдық күш біріктіруге бағытталған бастамаларға қолдау көрсетеді. Таяуда Қазақстан Президенті Қасым-Жомарт Тоқаевтың Бұхараға жасаған сапарында Ахуалдық орталықтың жұмысымен танысты. Онда халықтың қауіпсіздігін қамтамасыз ету және ықтимал төтенше жағдайларға дайындық мәселелеріне ерекше назар аударылды. Бұл азаматтарды қорғау мәселесі мемлекеттік саясаттың өзегі екенін айғақтайды. Осы ретте талдау және болжау орталықтарын бірлесе дамытуға, мемлекетаралық оқу-жаттығуларды тұрақты негізде ұйымдастыруға ерекше назар аудару қажет деп санаймыз, — деп мәлім етті ведомство басшысы.

Фото: Әлихан Асқар/Kazinform

Сонымен қатар Kazinform тілшісіне сұхбат берген Өзбекстан Төтенше жағдайлар министрлігінің баспасөз хатшысы Мурат Садыков конференцияның маңызы жайлы баяндады.

— Өздеріңіз білетіндей 1966 жылы 26 сәуірде Ташкентте ірі жер сілкінісі болды. Осы қайғылы зілзала құрбандарын еске алуға және табиғи апаттардың салдарын төмендетуге арналған бұл іс-шара халықаралық қауымдастық тарапынан қолдауға ие болып отыр. Конференцияға қатысушылар ортақ іс-қимыл жоспарын әзірлеу мүмкіндіктерін қарастырып жатыр. Бұл іс-шара тек құрбандарды еске алумен шектелмейді, сондай-ақ ол ықтимал апаттарды болжау, төтенше жағдай кезіндегі жұмысты үйлестіру мәселелерін талқылауға арналған, — деді Мурат Садыков Kazinform тілшісінің сауалына жауап бере отырып.

Фото: Әлихан Асқар/Kazinform

Іс-шара соңында министрлер бірлескен мәлімдемеге қол қойды.

Фото: Әлихан Асқар/Kazinform

Еске салайық, бұған дейін Ташкентте Халықаралық зілзала құрбандарын еске алу күніне арналған конференция өтіп жатқанын хабарлап едік.