Өскемен мен Риддер арасын жалғайтын жол қысқарады

Алтай тауы арқылы қос қаланы байланыстыратын жаңа жол салынады. Автожолдың жобасы дайын. Қазір жергілікті билік қаржы көзін қарастырып жатыр.  "Жаңа жол салынса, жүк тасымалының көлемі артып, тауда орналасқан туристік кешендерге жету  жеңілдейді" -, дейді мамандар.

Қос қаланың арасында жол қысқарады 

Риддердің туристік әлеуеті зор. Әсіресе тау сілемінде орналасқан кешендерде қыста демалушылар көп. Ресейдің өзінен 10 мыңнан астам турист келеді. Жаңа жол салынса бұл көрсеткіш кемінде екі есе артады- дейді мамандар. Себебі қазір жолаушылар қатынап жүрген жол қауіпті, өткен ғасырдың 60-жылдары салынған. Ал жаңадан салынатын күрежол Өскемен мен Риддер арасын 43 шақырымға қысқартады. Жоба құны шамамен 38 млрд теңге. Таудағы шипажай иелері: «Жаңа жолға жұмсалатын шығын өзін өзі ақтайды», -  дейді.

Евгений Бельц, туристік кешен басқарушысы:

- Бізге келетін демалушылардың 99 пайызы осы жолмен жүреді. Себебі, туристің барлығы Өскемен арқылы қатынайды. Келген, кеткен жолаушыларды тасымалдау үшін күніне кемінде екі мәрте жүреміз. Жол қауіпті әрі ұзақ.

Өскеменнен Риддерге жүк таситын көліктер де осы жолмен жүреді. Демек, жаңа жол өңірдегі азық-түлік қауіпсіздігіне де оң әсерін тигізеді. Сондықтан "Өскемен-Риддер" бағытындағы бұрылысы көп ескі  жол қайта жаңғыртылады. Жаңа жоба жол жүруге кететін уақытты 1,5 сағаттан 40 минутқа дейін қысқартады. Жергілікті биліктің мәліметінше автожол жобасын қаржыландыру мәселесі алдағы бір айда шешіледі.

Қаныбек Төлеухан, қала әкімінің орынбасары:

-Бізге мынау Өскемен-Табиха-Тарханка-Черемшанка-Риддер қысқа тасжолын салу өте қаламызға керек. Бұл біздің әлеуетімізді экономикалық арттырады және туристік тартымдылығымызды көбейтеді біздің қаламызға.

Одан бөлек, Риддер маңынан жаңа шекара бекетін ашу мәселесі қарастырылып жатыр. Қазір бұл мәселе Қазақстанның Парламент Сенаты мен Ресей Федералдық жиналысы федерация кеңесі арасында талқылануда. Ол үшін ынтымақтастық жөніндегі арнайы комиссия құрылды.

Андрей Яцкин, РФ Федералдық жиналысы федерация кеңесі төрағасының бірінші орынбасары:

- Екіжақты кездесуде шекарадан өту мәселелері, жолаушылар тасымалы мен туристік инфрақұрылым талқыланды. Біздің негізгі мақсатымыз қос елдің азаматтарына тиімді нәтижеге қол жеткізу.

2025 жылдың 6 айында Қазақстанға 1,5 млннан астам ресейлік турист келген. Көрші елден келетін демалушыларды қызықтыратын негізгі орындар мұзтау шыңы мен Алтай таулары. Сондықтан Ресей мен шығыс Қазақстан арасын жалғайтын жолды жаңартудың маңызы жоғары.

Авторлары: Елдос Кәкенов, Вячеслав Ветлугин және Дмитрий Пыхтин