Риддер тұрғындары аюлардан қорқып отыр

Риддер тұрғындары аюлардан қорқып отыр. Жыртқыштар қаланың шетіне таяу келіп жүр. Омарталарды қиратып, саяжайларға кіріп кеткен. Қала тұрғындарының айтуынша, кейінгі жылдары аю көбейген. Бұл ақпаратты аңшылар да растап отыр. Орманда қорек таппай, ашыққан аюлар елдімекенге азық іздеп келеді. 

Бұл - Риддер маңындағы Алтай тауының сілемдері. Қонжығын ерткен аюды тұрғындар дронмен түсіріп алыпты. «Жыртқыш өзінің тіршілік ететін аумағында алаңсыз жүр. Алайда табиғаттың заңын адамның өзі бұзады», - дейді мамандар. Ағашты кесіп, аң мен құстың қонысын тарылтады.  Жидек азайып, қорексіз қалған аюлар енді елдімекендерді жағалап жүр. Экология және табиғи ресурстар министрлігінің мәліметінше ел шығысында аю саны 4,5 мыңға жеткен. Алайда қала жыртқыш саны әлдеқайда көп болуы мүмкін деп отыр.     

Риддердің шет жағында аюлар жиі кездеседі. Саяжай кооперативінің төрайымы Хавра Шаипова полиция мен құтқарушыларды көмекке шақырған. Тіпті адамдарды эвакуациялауға тура келді. 

Хавра Шаипова, Риддер қаласының тұрғыны:

- Полиция шақырып, адамдарды қауіпсіз жерге көшіруге тура келді. Дабыл соғып үркіттік. Содан кейін ғана аюлар ағаш арасына кіріп кетті. Өйткені жұрт қорыққаннан саяжайдан шыға алмай қалды.

Бес жыл бұрын Шығыс Қазақстанда аю саны 2654 болса, қазір екі есе көп. 

Сергей Алексеев, Риддер қаласының тұрғыны:

- Аюлар көбіне түнде жүреді. Күндіз көрінбейді, бір жерде тығылып жатады. Кешкілік сыртқа шығудан қалдық. Үреймен тұрып жатырмыз.

«Аю саны көбейгенімен, бірақ табиғи азық жетіспейді. Биыл көктемгі үсік салдарынан орманда жидек аз», - деді Табиғи ресурстар басқармасының мамандары. Аюлардың бұлайша адамға жақындауына омарташылар да себепкер. Көбі бал қалдығын ағаш арасына тастап, омартаның айналасындағы шөпті шаппайды.